Өнөөдөр рок хөгжмийн түүхэн дэх хамгийн алдартай бүтээлүүдийн нэг болох “Fleetwood Mac” хамтлагийн “Dreams” дуу мэндэлсэн онцлох өдөр тохиож байна. 1970-аад оны дундуур тус хамтлагийн гишүүд хувийн харилцааны гүн хямралд орж, салцгааж байх үедээ хөгжмийн ертөнцийн сод бүтээл болох “Rumours” цомгоо бичүүлж байсан түүхтэй.
Хамтлагийн дуучин Стиви Никс өөрийн амраг, гитарчин Линдси Бэкингэмтэй харилцаагаа тасалсны дараа түүний “Go Your Own Way” дуунд хариу барьж, “Dreams” дуугаа ердөө арван минутын дотор бичсэн гэдэг. Энэхүү дуу нь харилцааны төгсгөл, эрх чөлөө болон ирээдүйн найдварыг өгүүлсэн бөгөөд Бэкингэм өөрөө энэ дууны гитарын аялгууг тоглосон нь урлагийн хүчээр хувийн зөрчлөө даван туулсны илрэл болсон юм.
“Dreams” дуу 1977 оны гуравдугаар сарын 24-нд “Rumours” цомогт багтан гарч, тухайн оныхоо зургаадугаар сард Billboard Hot 100 чартыг тэргүүлснээр хамтлагийн АНУ дахь цорын ганц “No. 1” хит болж чадсан билээ. “Rumours” цомог нь дэлхий даяар 40 сая гаруй хувь борлогдож, Грэммийн “Шилдэг цомог” шагналыг хүртэн, бүх цаг үеийн хамгийн шилдэг борлуулалттай рок цомгуудын нэгт зүй ёсоор тооцогддог.
Өнөөдрөөс бараг хагас зууны өмнө бичигдсэн ч “Dreams” дуу нь орчин үеийн сонсогчдын дунд, тэр дундаа олон нийтийн сүлжээгээр дамжин шинээр тренд болсоор байгаа нь Стиви Никсийн 10 минутын дотор бичсэн тэрхүү мэдрэмж хэчнээн үнэ цэнтэй байсныг баталж байна.
