Apple компани хэрэглэгчдэд код бичих чадваргүй байсан ч хиймэл оюун ухаан ашиглан аппликейшн бүтээх боломжийг олгодог байсан “Anything” апп-ыг Апп Стор (App Store) платформоос албан ёсоор хаслаа. Энэхүү шийдвэр нь Apple-ийн зүгээс “vibe coding” буюу энгийн хэрэглэгчдэд зориулсан апп бүтээх технологийг зохицуулах, хянах бодлогынх нь үргэлжлэл болж байна.
“Anything” апп нь том хэлний загваруудыг (LLMs) ашиглан апп үүсгэхээс гадна сурталчилгааны материалыг бэлтгэх боломжтой гэдгээрээ богино хугацаанд олны анхаарлыг татаад байсан юм. Гэвч Apple-ийн зүгээс тус програмыг Апп Сторын 2.5.2 дугаар заалтыг зөрчсөн гэж үзжээ. Уг заалтад “Аппликейшнүүд нь өөрийн багцаас гадуурх өгөгдлийг унших, бичих, эсвэл апп-ны үйл ажиллагааг өөрчлөх кодыг гаднаас татаж суулгах ёсгүй” хэмээн заасан байдаг.
Энэхүү үйл явдал нь Apple өөрийн Xcode программдаа хиймэл оюуны агентуудыг ашиглан код хянах, засварлах боломжуудыг нэвтрүүлж эхэлсэн цаг үетэй давхцаж байгаа юм. Apple компани “Anything” апп-ыг хассантай холбоотой албан ёсны дэлгэрэнгүй тайлбар өгөөгүй байгаа ч, өмнөх ижил төстэй тохиолдлуудад компанийн хяналтаас гадуур үйл ажиллагаагаа дур мэдэн өөрчилдөг апп-уудтай тууштай тэмцэнэ гэдгээ мэдэгдэж байсан билээ.
Технологийн салбарын шинжээчдийн үзэж буйгаар, Apple-ийн энэхүү алхам нь Апп Сторын аюулгүй байдал, чанарын хяналтыг чангатгах зорилготой ч нөгөө талаас инновацийн зарим боломжуудыг хязгаарлаж байна хэмээн шүүмжлэх хүмүүс ч байна. Одоогийн байдлаар “Anything”-ээс гадна Replit, Vibecode зэрэг ижил төрлийн үйлчилгээтэй програмууд Apple-ийн хатуу хяналт дор ороод байгаа юм.
Дэлгэрэнгүйг эх сурвалжаас харах
