Энэ улиралд гурван ч дасгалжуулагч сольж, Премьер лигээс унах аюултай нүүр тулаад байсан “Тоттенхэм” клуб Итали мэргэжилтэн Роберто Де Зербитэй таван жилийн гэрээ байгууллаа. Бөмбөг эзэмшилт, эрчимтэй шахалт (pressing) болон довтолгооны хурдыг эрхэмлэдэг түүний өвөрмөц тактик нь багийн зарим тоглогчдын карьерт шинэ эргэлт авчирна гэж шинжээчид үзэж байна.
Шинэ дасгалжуулагчийн системээс хамгийн их ашиг хүртэх тоглогчоор хамгаалагч Кристиан Ромеро нэрлэгдэж байна. Түүний түрэмгий тоглолт, бөмбөг таслах чадвар болон хамгаалалтаас довтолгоо эхлүүлэх мэдрэмж нь Де Зербийн хүсдэг “төгс хамгаалагч”-ийн дүр төрхөд яв цав нийцдэг. Түүнчлэн жигүүрийн хамгаалагч Дестини Удожигийн физик чадавх болон хурд нь Итали мэргэжилтний системд шилдэг жигүүрийн тоглогч болон төлөвшихөд нь туслах юм.
Довтолгооны шугаманд Хави Симонс болон залуу авьяастан Матис Тел нар Де Зербийн удирдлага дор өөрсдийгөө шинээр нээх боломжтой. Симонсын техникийн өндөр ур чадвар, бүтээлч сэтгэлгээ нь багийн довтолгоог илүү уян хатан болгох бол Телийн хурд болон шууд тоглох арга барил нь сөрөг довтолгооны гол зэвсэг болох ирээдүйтэй.
Мөн энэ улиралд бэртэл болон багийн тогтворгүй байдлаас шалтгаалж форм алдаад байсан Доминик Соланкегийн хувьд Де Зерби шинэ боломж олгож байна. Түүний систем нь довтлогчид гоол оруулах олон боломжийг бүрдүүлдэг тул Соланке өөрийн итгэлийг сэргээж, мэргэн буучийн төрхөө эргүүлэн олоход нь шинэ тактик чухал нөлөө үзүүлэх юм. Хэрэв “Тоттенхэм” лигтээ үлдэж чадвал ирэх улиралд Де Зербийн удирдлага дор огт өөр баг болон хувирах хүлээлт үүсээд байна.
Дэлгэрэнгүйг эх сурвалжаас харах
