PFL-ийн хөнгөн жингийн аварга асан Гажи Рабаданов таван жилийн турш үргэлжилсэн ялалтын цуврал нь тасалдсаны дараа анхны тулаанаа хийхээр товоо зарлалаа. Тэрээр ирэх тавдугаар сарын 2-нд АНУ-ын Өмнөд Дакота мужийн Сиу Фолс хотод болох PFL арга хэмжээний дэд гол тулаанд Латвийн тулаанч Алекс Чизовтой хүч үзэхээр болсныг “MMA Fighting” сайт баталгаажуулсан байна.
Гажи Рабаданов өнгөрсөн наймдугаар сард Алфи Дэвист ялагдахаасаа өмнө 12 тулаан дараалан ялалт байгуулаад байсан хүчирхэг тамирчин юм. Түүний замналд UFC-ийн туршлагатай тулаанчид болох Кевин Ли, Марк Диакезе нарыг нокаутаар ялсан амжилт байхаас гадна Bellator-ийн аварга Брент Примусыг буулган авч байсан түүхтэй. Тэрээр энэ удаагийн тулаанаар дахин ялалтын замдаа орж, аваргын төлөөх өрсөлдөөнд эргэн ирэхийг зорьж байна.
Нөгөө талд Алекс Чизов сүүлийн гурван тулаандаа дараалан ялалт байгуулж, өөрийн формоо сайн хадгалж байгаа тамирчин юм. Тэрээр PFL Europe-д амжилттай өрсөлдөж, хамгийн сүүлд Коннор Хьюзыг хүнд цохилтоор буулган авсан билээ. Хэдийгээр Чизов 13 ялалттай, ирээдүйтэй тулаанч боловч туршлага болон чансааны хувьд Рабадановын эсрэг “underdog” буюу ялагдах магадлал өндөртэй тамирчны байр сууринаас тулалдахаар байна.
Сиу Фолс хотод болох тус арга хэмжээний гол тулаанд нутгийн тамирчин Логан Сторли болон Флорим Зендели нар учраа таарсан бөгөөд Рабаданов, Чизов нарын тулаан үзэгчдийн хүлээж буй хамгийн сонирхолтой дэд тулаануудын нэг байх болно. Хөнгөн жингийн шилдэгүүдийн энэхүү тулаан нь тус жингийн чансааг тодорхойлоход чухал нөлөө үзүүлэх юм.
Дэлгэрэнгүйг эх сурвалжаас харах
