Загварын салбарын ажилтнуудын эрхийг хамгаалах Model Alliance байгууллагын үүсгэн байгуулагч Сара Зифф АНУ-ын хууль тогтоогчдод хандан нэгэн чухал шаардлага хүргүүллээ. Тэрээр загварын агентлагууд Жеффри Эпстайны үйлдсэн бэлгийн мөлжлөгийн гэмт хэргүүдэд хэрхэн зуучлагчаар оролцож байсныг нарийвчлан шалгаж, агентлагуудын удирдлагуудыг Конгрессын хороодод байцаахыг уриалсан байна.
Сара Зифф болон Эпстайны хэргийн 40 гаруй хохирогч хамтран Нью-Йоркийн Ерөнхий прокурор Летишиа Жеймс болон Конгрессын гишүүдэд илгээсэн захидалдаа загварын салбар нь эмзэг бүлгийн залуучуудыг мөлжигчдөд хүргэх гол суваг болж байсныг онцолжээ. Тэдний үзэж буйгаар Эпстайны хэрэгт холбогдсон олон хүний нэрс ил болж байгаа нь энэ систем зөвхөн нэг хүний үйлдлээр хязгаарлагдахгүй, салбарын хэмжээний гүнзгий асуудал болохыг харуулж байна.
Энэхүү тэмцэл нь өнгөрсөн онд Нью-Йоркт батлагдсан “Fashion Workers Act” хуультай нягт холбоотой юм. Уг хууль нь моделиудын эрхийг хамгаалах, агентлагуудын хяналтгүй эрх мэдлийг хязгаарлах, мөлжлөг, дарамтаас ангид аюулгүй ажлын орчинг бүрдүүлэхэд чиглэсэн түүхэн алхам болсон билээ. Хууль тогтоогч Ро Ханна энэхүү асуудлыг Хяналтын хороонд хүргүүлж, холбогдох хүмүүсээс гэрчийн мэдүүлэг авахаар ажиллахаа мэдэгдээд байна.
Сара Зифф өөрөө загвар өмсөгчөөр ажиллаж байхдаа мөлжлөгийн золиос болж байсан бөгөөд 2011 онд “Picture Me” баримтат киногоороо загварын ертөнцийн гялалзсан өнгөний цаана нуугдсан хар бараан системийг илчилж байсан юм. Түүний энэхүү шинэ алхам нь олон жилийн турш нууцлагдмал байсан гэмт хэргийн сүлжээг бүрэн илчлэх зорилготой ажээ.
