Хүнд жингийн боксын ертөнцөд цахиур хагалж буй 21 настай залуу боксчин Мосес Итаума ээлжит гайхалтай ялалтаа байгууллаа. Тэрээр Жермейн Франклинтай хийсэн тулааны тавдугаар раундэд өрсөлдөгчөө хүнд цохилтоор (нокаут) буулган авч, карьерынхаа бас нэгэн сэтгэлд хоногшсон мөчийг бүтээв.
Түүний промоутер Фрэнк Уоррен Итаумаг энэ жил дахин хоёр тулаанд гаргахаар төлөвлөж байгааг мэдэгдсэн. Төлөвлөгөө ёсоор долоодугаар сард ээлжит тулаанаа хийж, жилийн эцэст дэлхийн аваргын бүсний төлөө, магадгүй Мурат Гассиевтэй хүч үзэхээр бэлтгэж байна.
Хэдийгээр Итаума Филип Хрговичтэй тулалдах хүсэлтэй байсан ч Хргович ирэх тавдугаар сарын 16-нд Дэйв Аллентай тулалдахаар болсноор энэ төлөвлөгөө түр хойшлогдоод байгаа юм. Хргович залуу боксчны талаар нэлээд шүүмжлэлтэй байр суурь илэрхийлж, түүнийг “хэтэрхий их сурталчлагдсан” хэмээн дүгнэжээ.
Хргович хэлэхдээ: “Одоохондоо тэр тийм ч сайн гэдэгт би итгэхгүй байна. Тэр хэзээ ч жинхэнэ бэрхшээлтэй тулгарч, хүчтэй цохилт авч үзээгүй. Сайн боксчин байх нэг хэрэг, харин жинхэнэ дайчин байх, зүрхтэй, бат бөх эрүүтэй байх нь өөр хэрэг. Би түүнийг ялж чадна гэдэгтээ итгэлтэй байна” хэмээн мэдэгдсэн юм. Гэсэн хэдий ч тэрээр Итаумаг өөрийн тулалдах боломжтой нэрсийн жагсаалтад байгааг баталж, жилийн эцэс гэхэд тэд рингнээ учрах магадлалтайг дуулгалаа.
Ийнхүү хүнд жингийн боксын шинэ үеийн төлөөлөл Итаума болон туршлагатай Хргович нарын хоорондох “үгэн тулаан” эхэлж, фэнүүдийн дунд хүлээлт үүсгэж байна.
