“Sky Sport”-ын мэдээлснээр Английн “Манчестер Юнайтед” клуб ирэх зуны наймааны цонхоор “Боруссиа Дортмунд” болон Германы шигшээ багийн хамгаалагч Нико Шлоттербекийг эгнээндээ нэгтгэхээр сонирхож эхэлжээ.
Өдгөө 26 настай төвийн хамгаалагчийг элсүүлэхэд ойролцоогоор 26 сая фунт стерлингийн санал тавихад талууд тохиролцоонд хүрэх боломжтой гэж шинжээчид үзэж байна. “Улаан чөтгөрүүд”-ийн хамгаалалтын шугамын гол тоглогчид бэртлийн улмаас удаан хугацаагаар талбайгаас гадуур байгаа нь багийн удирдлагуудыг ийнхүү яаралтай шинэ хамгаалагчийн эрэлд гарахад хүргэжээ.
Нико Шлоттербек нь орчин үеийн хөлбөмбөгийн хамгаалагчид байх ёстой хурд, дамжуулалт болон тоглолтыг унших чадвараараа Европын шилдэгт тооцогдож буй тул түүнийг “Олд Траффорд”-д ирвэл хамгаалалтын асуудлыг шийдвэрлэх гол хүн болно гэж найдаж байна. Энэхүү наймаа зуны шилжүүлгийн цонхны хамгийн анхаарал татсан үйл явдлуудын нэг байх төлөвтэй байна.
