Алдарт Goo Goo Dolls хамтлагийн аялан тоглолт дуучин Жонни Резникийн биеийн байдлаас шалтгаалан саатаад байна. Хамтлагийн гоцлол дуучин Жонни Резник хатгалгаа туссан болох нь тогтоогдсон тул Канадад хийхээр төлөвлөж байсан гурван тоглолтоо цуцлахаас өөр аргагүйд хүрсэн байна.
Өнгөрсөн пүрэв гарагт Онтарио мужийн Гамильтон хотын TD Coliseum-д болох ёстой байсан тоглолт эхлэхээс ердөө хэдхэн цагийн өмнө хамтлаг Инстаграм хуудсаараа дамжуулан албан ёсны мэдэгдэл гаргажээ. Уг мэдэгдэлд Жонни Резник хатгалгаатай гэж оношлогдсон тул тоглолтыг цуцалж байгаадаа харамсаж буйгаа илэрхийлээд, тасалбар худалдаж авсан иргэдэд төлбөрийг нь буцаан олгохоо мэдэгдсэн байна. Хамтлагийнхан ирэх бямба гарагт Лондон хотод болох тоглолтоороо үзэгчидтэйгээ уулзана гэдэгтээ итгэлтэй байгаа аж.
Үүнээс өмнө хамтлаг дөрөвдүгээр сарын 1-нд Ошава, дөрөвдүгээр сарын 3-нд Саулт Сент Мари хотуудад тоглох байсан ч шалтгаанаа тодорхой хэлэлгүйгээр хойшлуулаад байсан юм. Хэрэв дуучны биеийн байдал дээрдвэл тэд дөрөвдүгээр сарын 4-нөөс 11-ний хооронд Оттава, Лавал, Галифакс, Монктон зэрэг хотуудад таван тоглолт хийхээр төлөвлөж байна. Үүний дараа тавдугаар сард Лас Вегас болон АНУ даяар зуны аялан тоглолтоо үргэлжлүүлэх хуваарьтай байгаа юм.
Сошиал орчинд фэнүүд нь Жоннигийн эрүүл мэндэд санаа тавьж буйгаа илэрхийлэхийн зэрэгцээ зарим нь тоглолт цуцлагдсан талаарх мэдээллийг арай эрт өгөх ёстой байсныг сануулжээ.
Сүүлийн үед Goo Goo Dolls хамтлагийн 1998 оны алдарт Iris дуу нь сошиал медиад хүчтэй тренд болж, Billboard-ын Дижитал дууны борлуулалтын жагсаалтын зургаадугаар байрт эргэн ирээд байна. Жонни Резник энэ талаар хэлэхдээ, дуу нь гарснаас хойш бараг 30 жилийн дараа залуу үеийнхэнд шинээр танигдаж, ийм их дэмжлэг авч байгаад маш их баяртай байгаагаа илэрхийлжээ.
