АНУ-ын Агаарын цэргийн хүчин домогт А-10 Warthog дайрагч онгоцны ашиглалтын хугацааг уртасгах, байлдааны чадварыг нь нэмэгдүүлэх зорилгоор агаарт цэнэглэх шинэ системийг туршиж байна. Энэхүү шинэчлэл нь Номхон далайн бүс нутагт үүсэж болзошгүй ирээдүйн мөргөлдөөний үед стратегийн чухал ач холбогдолтой байх боломжтойг мэргэжилтнүүд онцоллоо.
А-10 онгоцонд цэнэглэх тусгай хоолой суурилуулав
Туршилтын хүрээнд А-10 онгоцны хамар хэсэгт агаарт цэнэглэх зориулалттай нэмэлт шон хоолойг (probe) суурилуулж, анхны нислэгээ амжилттай үйлдсэн байна. Ингэснээр А-10 онгоц зөвхөн стандарт түлш цэнэглэгч хөлгүүдээс гадна C-130 Hercules зэрэг тээврийн онгоцноос агаарт цэнэглэлт хийх боломжтой болж байгаа юм. Энэ нь алслагдсан бүс нутагт урт хугацааны үйл ажиллагаа явуулах чадварыг эрс сайжруулна.
“Agile Combat Employment” ба стратегийн давуу тал
Энэхүү технологи нь АНУ-ын Агаарын цэргийн хүчний “Agile Combat Employment” буюу хурдавчилсан байлдааны тактикийг дэмжих зорилготой. Одоогийн ашиглагдаж буй системүүд нь онгоцыг өндөр авсан үед цэнэглэдэг тул дайсны агаарын довтолгооноос хамгаалах радарт өртөх эрсдэл өндөр байдаг. Харин шинэ систем нь:
- Нам өндөрт болон бэлэн бус аэродромоос хөөрөх үед цэнэглэлт хийх.
- Дайсны бүслэлт болон агаарын довтолгооноос зайлсхийх.
- Алслагдсан цэгүүдэд байрлан ажиллах боломжийг олгоно.
Бусад онгоцуудад ашиглах боломж
Туршилт амжилттай болбол энэхүү системийг зөвхөн А-10 гэлтгүй F-16, F-15, тэр байтугай F-35 зэрэг орчин үеийн сөнөөгч онгоцуудад ч ашиглах боломжтой гэж үзэж байна. Ялангуяа А-10 онгоцны оролцдог эрэн хайх, аврах (CSAR) тусгай ажиллагааны үед агаарт цэнэглэх чадвар нэмэгдсэнээр аврах ажиллагааны хүрээ тэлж, хугацаа хожих давуу тал бүрдэх юм.
Энэхүү шинэчлэл нь А-10 онгоцыг орчин үеийн цэргийн мөргөлдөөний шинэ нөхцөл байдалд дасан зохицох чадвартай хэвээр байгааг харуулж байна.
