Бразилийн Ресиф хотод өссөн Жозе Делано багаасаа тулааны урлагт дурласан ч амьдралын эрхээр спортын замналаа түр орхиж, 2016 онд армийн явган цэргийн ангид алба хаахаар шийджээ. Цэргийн хатуу дэг журам, тогтвортой амьдрал түүнийг тулааны мөрөөдлөөс нь хөндийрүүлэх дөхсөн ч авга ахынхаа зөвлөгөөгөөр дахин бээлий өмсөж, 2017 оноос мэргэжлийн спортод эргэн ирсэн түүхтэй.
Тэрээр Рио-де-Жанейро хотыг зорьж, UFC-ийн аварга асан Мурило Бустамантегийн удирдлага дор “Brazilian Top Team” клубт бэлтгэл хийж эхэлснээр амжилт нь эрс ахисан байна. Өмнө нь 77 кг-ын жинд тулалддаг байсан Делано жин хасаж, 66 кг-д хүч үзэх болсноор LFA холбооны аварга болж, улмаар “Dana White’s Contender Series” тэмцээнд Мануэль Эспозитог ялснаар дэлхийн хамгийн том холбоо болох UFC-д тулалдах эрхээ авчээ.
“Би армиас гараад, өөрийн итгэл үнэмшил болон зорилгоо дэлхий даяар түгээхээр UFC-д ирсэн. Энэ бол миний амьдралын дараагийн том шат” хэмээн Делано өөрийн шийдэмгий байдлаа илэрхийлсэн юм. Тэрээр өөрийнх нь тулаан болох хүртэл бусад тэмцээнийг шууд үзэхгүй гэж өөртөө амлалт өгч байсан бөгөөд 2025 оны 10 дугаар сард Чарльз Оливейра, Матеуш Гамрот нарын тулааныг анх удаа дэргэдээс нь үзэж сонирхжээ.
Ирэх бямба гарагт Жозе Делано өөрийн анхны тулаанаа Роберт Ручалагийн эсрэг хийхээр бэлтгэж байна. Өрсөлдөгчөө босоо болон хэвтээ барилдааны аль алинд нь чадварлаг нэгэн гэдгийг хүлээн зөвшөөрч байгаа ч Делано өөрийгөө илүү тайван, бэлтгэл сайтай байгааг онцоллоо. Тэрээр армид сурсан тэсвэр хатуужил, техник ур чадвараа хослуулан үзэгчдэд мартагдашгүй тулаан үзүүлэхээ амлаж байна.
