Боксын спортын амьд домог, зургаан өөр жинд дэлхийн аварга цол хүртэж байсан “Алтан хүү” Оскар Де Ла Хоя 53 настайдаа рингэнд эргэн ирэхэд бэлэн байгаагаа албан ёсоор мэдэгдлээ. Тэрээр хамгийн сүүлд 2008 онд Мэнни Пакьяотой тулалдсанаас хойш мэргэжлийн боксоос хөндийрсөн ч сүүлийн таван жилийн турш бие бялдар, сэтгэл зүйн бэлтгэлээ эрчимтэй базаасан гэдгээ онцолжээ.
Мэйвезерт хаягласан уриалга
Де Ла Хоягийн гол бай нь түүний хуучин өрсөлдөгч, ялагдашгүй рекордтой Флойд Мэйвезер юм. Тэрээр сошиал сүлжээгээр дамжуулан Мэйвезерт хандан “Жижиг тулаан хийж, хялбар замаар рекордоо хамгаалахаа зогсоож, надтай жинхэнэ тулаан хий” хэмээн дуудсан байна. Де Ла Хоя өөрийгөө одоо ямар ч үеийнхээс илүү эрч хүчтэй, тулалдахад бэлэн байгаагаа батлан илэрхийлэв.
Жейк Полтой ч хүч үзэхэд бэлэн
Хуучин аварга зөвхөн Мэйвезерээр хязгаарлагдсангүй, сүүлийн үед боксын ертөнцийг шуугиулж буй YouTube-ийн од Жейк Полтой ч тулалдахад татгалзах зүйлгүй гэдгээ мэдэгдлээ. “Би одоо хэнтэй ч тулалдахад бэлэн байна. Жейк Пол байсан ч хамаагүй, би өөрийнхөө түвшинг харуулах болно” гэж тэрээр нэмж хэлжээ.
Хэдийгээр Де Ла Хоягийн эргэн ирэх тулааны тов хараахан гараагүй байгаа ч түүний энэхүү шийдэмгий мэдэгдэл боксын хорхойтнуудын дунд ихээхэн хүлээлт үүсгээд байна. Хэрэв Мэйвезер болон Де Ла Хоя нарын даагаа нэхэх тулаан бодит ажил болбол энэ нь спортын түүхэн дэх хамгийн өндөр хандалттай үйл явдлуудын нэг болох нь дамжиггүй.
