Rockstar Games-ийн ажилтан асан Роб Карр Grand Theft Auto 6 (GTA 6) тоглоомын хөгжүүлэлтийн талаар сонирхолтой мэдээлэл хуваалцлаа. Тэрээр тус студи нь “хязгааргүй нөөц” болон техникийн асар өндөр зорилго тавин ажиллаж байгааг онцлоод, шинэчлэгдсэн RAGE хөдөлгүүр нь тоглоомын боломжуудыг эрс нэмэгдүүлнэ гэдгийг тэмдэглэжээ.
Каррын үзэж буйгаар, Rockstar Games нь GTA 5-аас хойш гарсан технологийн үсрэлтийг харгалзан RAGE хөдөлгүүрийг бүхэлд нь шинэчлэн бүтээсэн байх магадлалтай байна. Энэхүү шинэчлэл нь NPC буюу туслах дүрүүдийн “нөхцөлт харилцан яриа”-г цоо шинэ түвшинд гаргах бөгөөд цаг агаар, өдрийн цаг болон тоглогчийн үйлдлээс хамааран асар олон хувилбартай диалогиудыг бодит цаг хугацаанд үүсгэх боломжийг олгох аж.
Мөн тэрээр GTA 4-ийн банкны дээрэм болон GTA 5-ын гурван гол дүрийн системүүд нь GTA 6-гийн илүү бодит орчин, механик ажиллагааны техникийн үндэс суурь болсон гэж үзэж байна. Өмнөх үеийн консолуудын санах ойн хязгаарлалтаас болж хэрэгжүүлж чадаагүй байсан, тоглогчийн үйлдэлд туйлын мэдрэмтгий харьцах системүүдийг энэ удаад нэвтрүүлж байгаа төлөвтэй байна.
Rockstar Games-ийн зүгээс 2026 оны санхүүгийн жилд багтаж тоглоомоо гаргахаар төлөвлөж буй бөгөөд хүлээлт асар өндөр байна. Шинэ хөдөлгүүрийн ачаар “NPC-ийн ярианы динамик систем” болон “физик симуляцид суурилсан усны мандал” зэрэг өмнө нь тоглоомын салбарт боломжгүй гэж тооцогдож байсан зүйлсийг хэрэгжүүлж чаджээ. Энэ нь GTA 6-г зүгээр нэг график сайжруулсан хувилбар биш, харин бодит байдалд хамгийн ойртсон цоо шинэ бүтээл болно гэдгийг баталж байна.
