Шинжлэх ухааны салбарт эрчим хүчний технологийн ирээдүйг өөрчлөхүйц нэгэн томоохон нээлт гарлаа. Эрдэмтэд цэнэглэх, хадгалах болон энерги ялгаруулах чадвартай туршилтын квант батерейг амжилттай бүтээж, шинэ үеийн технологийн үндсийг тавив.
Уламжлалт батерейгаас ялгаатай нь квант батерей нь квант физикийн өвөрмөц зарчмууд болох “давхцал” болон гэрэл, электроны харилцан үйлчлэлийг ашигладаг байна. Энэхүү технологийн хамгийн гайхалтай онцлог нь батерейны хэмжээ томрох тусам цэнэглэгдэх хурд нь улам нэмэгддэгт оршиж байгаа юм. Энэ нь бидний мэдэх ердийн батерейны ажиллах зарчмаас тэс өөр буюу физикийн тогтсон ойлголтыг эвдэж буй үзэгдэл юм.
Австралийн үндэсний шинжлэх ухааны агентлаг CSIRO, RMIT их сургууль болон Мельбурний их сургуулийн эрдэмтэд хамтран энэхүү судалгааг удирдсан байна. Тэд тасалгааны хэвийн температурт батерейг маш хурдан цэнэглэж, эрчим хүчийг тогтвортой хадгалж болохыг туршилтаар баталжээ.
Судалгааны багийн ахлах, доктор Жэймс Куач “Энэхүү туршилтын төхөөрөмж нь ирээдүйн эрчим хүчний шийдлүүдийн суурь болж байна. Хэдийгээр цаашид хийх ажил их байгаа ч бид квант батерейг бодит амьдралд нэвтрүүлэх хамгийн чухал алхмаа хийлээ” хэмээн онцолсон юм.
Квант батерейны технологи одоогоор эхний шатандаа байгаа ч ирээдүйд цахилгаан автомашиныг ердийн шатахуун түгээхээс ч хурдан хугацаанд цэнэглэх, цахилгаан хэрэгслүүдийг алсын зайнаас утасгүйгээр эрчим хүчээр хангах зэрэг асар их боломжийг амлаж байна. Энэхүү нээлт нь өнөөгийн лити-ион батерейны технологиос хэд дахин давсан үзүүлэлттэй эрчим хүчний эх үүсвэр бий болох цаг ойртсоныг харууллаа.
