АНУ-ын Тэнгисийн цэргийн хүчний зэвсэглэлд байгаа 11 нисэх онгоц тээвэрлэгч хөлөг онгоц бүгд таван тэнгисийн бээр буюу ойролцоогоор 9.2 км-ийн зайд хамгаалалтын бүс тогтоох хатуу дүрмийг баримталдаг. Энэхүү дүрэм нь далайд гарч болох аливаа мөргөлдөөнөөс сэргийлэх, нислэгийн үйл ажиллагааны аюулгүй байдлыг хангах үндсэн зорилготой юм.
100,000 гаруй тонн жинтэй эдгээр аварга хөлгүүд нь асар их инерцитэй байдаг тул чиглэлээ өөрчлөх эсвэл зогсоход ихээхэн хугацаа, орон зай шаарддаг. Тиймээс таван милийн бүс нь өөр ямар нэгэн хөлөг онгоцтой мөргөлдөх эрсдэлийг хамгийн бага түвшинд байлгадаг байна. Энэхүү бүсийг зөрчих тохиолдол маш ховор бөгөөд зөвхөн хүн усанд унах эсвэл байлдааны онцгой нөхцөл байдал үүссэн үед л зөвшөөрдөг.
Аюулгүй байдлын энэхүү хатуу хяналт нь 2000 онд USS Cole (DDG-67) хөлөг онгоц халдлагад өртсөнөөс хойш улам бүр чангарсан юм. Жижиг оврын завь, хөлөг онгоцууд тэсрэх төхөөрөмж тээвэрлэн ойртохоос сэргийлэх нь нисэх онгоц тээвэрлэгчийг живэх аюулаас хамгаалах хамгийн чухал алхам болдог. Түүнчлэн онгоц хөөрөх болон газардах үед хөлөг онгоц заавал салхины чиглэл рүү эргэж маневр хийх шаардлагатай болдог тул орчин тойронд нь саад болох өөр хөлөг онгоц байхгүй байх нь нэн чухал байдаг аж.
Мөн нисэх онгоц тээвэрлэгч дээрх өндөр хүчин чадалтай радарууд болон цахим дайны төхөөрөмжүүдийн дохио нь иргэний хөлөг онгоцнуудын навигаци, холбооны хэрэгсэлд саад учруулах эрсдэлтэй тул тэдгээрийг ийнхүү зайнаас хол байлгадаг байна. Нисэх онгоц тээвэрлэгч хөлөг нь үргэлж шумбагч онгоц, пуужин тээгч болон бусад дагалдагч хөлгүүдээр хүрээлүүлэн явдаг нь зөвхөн өөрийн бус, ойр орчмын бүх хөлөг онгоцны аюулгүй байдлыг цогцоор нь хангаж буй хэрэг юм.
