Meta компани хиймэл оюун ухааны салбарт тэргүүлэх амбицтай зорилгынхоо хүрээнд 600 тэрбум ам.доллар давсан асар их хөрөнгө оруулалт хийхээр төлөвлөж байгаа бөгөөд хамгийн сүүлийн үеийн загваруудаа нээлттэй эх сурвалж (open-source) хэлбэрээр олон нийтэд танилцуулахад бэлэн болжээ.
Axios агентлагийн мэдээлснээр, Scale AI-г үндэслэгч Александр Вангийн шууд удирдлага дор бүтээгдсэн эдгээр шинэ загварууд нь Meta-гийн түүхэн дэх анхны бүрэн нээлттэй эх сурвалжтай бүтээгдэхүүн болох юм. Аюулгүй байдлын үүднээс зарим хэсэг нь нууцлагдмал хэвээр үлдэх ч, ихэнх өрсөлдөгчдөөсөө ялгаатай нь Meta өөрийн загваруудаа лицензээр ашиглах өргөн боломжийг бусдад олгохоор шийджээ.
Энэхүү алхам нь AI кодчилолын салбарт томоохон нөлөө үзүүлж эхлээд байна. Тухайлбал, Cursor компани Moonshot AI-гийн Kimi 2.5 загвар дээр суурилан өөрийн Composer 2 загварыг хэдийн бүтээсэн бөгөөд модел боловсруулах өртөг өндөр байгаа энэ үед нээлттэй эх сурвалжийн хандлага улам бүр нэмэгдэх төлөвтэй байна. Meta ийнхүү загваруудаа нээлттэй болгосноор зах зээлд дахин тэргүүлэх байр сууриа олж авахыг эрмэлзэж байгаа аж.
Гэсэн хэдий ч Meta-д тулгарч буй гол бэрхшээл нь загваруудын чанар хэвээр байна. Өмнө нь LLaMa загваруудаа нээлттэй болгож байсан ч хэрэглэгчдийн дунд төдийлөн амжилт олоогүй бөгөөд өнгөрсөн жил танилцуулсан LLaMa 4 загвар нь хүлээлтэд хүрэхгүй, тааруу үр дүн үзүүлсэн юм.
Тус компани салбарын шилдэг мэргэжилтнүүдийг 100 сая ам.долларын урамшуулалтайгаар татан ажиллуулсан ч одоогоор дорвитой амжилтад хүрч чадаагүй байна. Саяхан гарах ёстой байсан шинэ загварын нээлт гүйцэтгэл муу байгаагаас болж хойшлогдсон нь Марк Зукерберг болон Александр Ван нарын харилцаанд сэв суулгасан гэх мэдээлэл ч гарчээ. Тиймээс энэ удаагийн шинэ загварууд амжилттай болох эсэх нь Вангийн карьер болон Meta-гийн ирээдүйд шийдвэрлэх үүрэг гүйцэтгэхээр байна.
