Жэйк Пол болон ММА-гийн домог Нэйт Диаз нарын даагаа нэхэх тулаан Netflix-ийн дамжуулах хоёр дахь томоохон тулааны үдшийн гол үйл явдал болохоор төлөвлөгдөж байна. Энэхүү арга хэмжээ нь Ронда Раузигийн эргэн ирэлтийн тулааны дараах ММА-гийн хамгийн том шоу болох хүлээлттэй байгаа юм.
Жэйк Пол өмнө нь Майк Тайсонтой хийсэн боксын тулаанаараа Netflix платформ дээр 125 сая үзэгчийг татаж, асар том амжилт үзүүлсэн. Одоо тэрээр холимог тулааны (ММА) ертөнцөд хүч үзэхээр бэлтгэж байгаа бөгөөд Ронда Раузи, Жина Карано нарын эмэгтэй тулаанчдын түүхэн тулааны дараа өөрийн ММА дахь дебютээ Нэйт Диазын эсрэг хийхээ албан ёсоор зарлалаа. Пол өмнө нь боксын рингэнд Диазыг буулган авч байсан бол энэ удаад Диазын “үндсэн талбар” болох ММА-д хүч үзэх сонирхолтой байгаагаа илэрхийлсэн юм.
Нэйт Диаз өнгөрсөн жил боксын тулаанд ялагдсаныхаа дараа Жэйк Полыг ММА-д тулалдахыг уриалж байсан. Наймдугаар сард Майк Перриг ялсны дараа Пол энэхүү урилгыг хүлээн авч, тулаан болох бүрэн боломжтойг баталсан байна. “Most Valuable Promotions” (MVP)-ийн гүйцэтгэх захирал Накиса Бидариан хэлэхдээ:
“Бидний ММА-д хийж буй анхны арга хэмжээ нь Жэйк Пол, Майк Тайсоны тулаан шиг нүсэр байх болно. Хэрэв энэ төсөл амжилттай болбол бид Netflix-тэй хамтран илүү олон ММА шоу зохион байгуулах болно” хэмээн онцолжээ.
Өмнө нь Нэйт Диаз болон PFL (Professional Fighters League) холбооны хооронд гэрээний нөхцөл тохироогүйгээс тулаан цуцлагдаж байсан удаатай. Гэвч энэ удаад Netflix-ийн оролцоотойгоор талууд хэлэлцээрийн ширээний ард сууж, тулааныг албан ёсоор баталгаажуулж чадсан байна. Энэхүү арга хэмжээ нь зөвхөн Жэйк Полын ММА дахь анхны тулаан болоод зогсохгүй, уламжлалт тулааны спорт болон стриминг платформын нэгдэл ямар өндөр түвшинд хүрснийг харуулах чухал алхам болох юм.
