19-р зууны сүүл үеийн Их Британи болон Австралийн гудамжаар жинхэнэ сүнс бус, харин бусдыг айлгаж таашаал авдаг, хорлонтой хуурамч сүнснүүд хэрэн хэсүүчилдэг байжээ. Энэхүү хачирхалтай үзэгдэл даамжирсаар сүүлдээ олон нийтийг хамарсан эмх замбараагүй байдал, гэмт хэргийн шинжтэй үйлдэл болон хувирч байсан түүхтэй.
Их Британид 1880-аад оны үед Пүрш хөлт Жек хэмээх этгээд алдаршжээ. Түүнийг байшингийн дээвэр дээгүүр ер бусын өндөр үсэрдэг, нүд нь гал мэт гэрэлтдэг, заримдаа амнаасаа цэнхэр дөл гаргадаг хэмээн иргэд дүрсэлдэг байв. Энэ нь ямар нэгэн үлгэр домог биш, харин тусгайлан бэлдсэн өмсгөл, баг ашиглан иргэдийг айлгах зорилготой залуусын тоглоом байсан гэж түүхчид үздэг.
Австралид энэхүү үзэгдлийг ларрикинс буюу ажилчин ангийн танхай залуус хэрэгжүүлдэг байв. Тэд шөнийн цагаар цагаан нөмрөг өмсөж, нүүрээ фосфортой буюу харанхуйд гэрэлтдэг будгаар будан хүмүүсийг айлгадаг байжээ. Нэгэн удаа рыцарийн хуяг өмсөж, цээжин дээрээ үхэлтэй учрахад бэлэн бай гэсэн бичигтэй гарч ирсэн этгээд хожим нь хортой гэрэлтдэг будаг хэрэглэснээсээ болж эрүүл мэндээрээ хохирч байсан тохиолдол бий.
Эдгээр хуурамч сүнснүүд зөвхөн айлгаад зогсохгүй эмэгтэйчүүдийг дарамтлах, дээрэм хийх зэргээр гэмт хэргийн шинжтэй үйлдэл гаргах болжээ. Нэгэн удаа сүнсний дүрд хувирсан этгээд өөрийг нь эсэргүүцсэн залууг хүнд шархдуулсан хэрэг гарсан байна. Үүнээс үүдэн Австралийн сонин хэвлэлүүд энэ асуудлыг сүнсний дарамт хэмээн нэрлэж, цагдаа нарыг эдгээр этгээдүүдийг газар дээр нь буудахыг уриалж байсан удаатай. Энэхүү хачирхалтай бөгөөд аюултай сүнсний тоглоом Дэлхийн нэгдүгээр дайн эхэлснээр аяндаа зогссон юм. Хүмүүсийн анхаарал бодит дайн, амьд үлдэх тэмцэл рүү шилжсэнээр гудамжны хуурамч сүнснүүд түүхийн хуудаснаа үлджээ.
