Алдартай боксчин, влогер Жэйк Пол холимог тулааны (ММА) салбарт хөл тавьж буй ч тус спортын ирээдүйг төдийлөн өөдрөгөөр харахгүй байгаагаа илэрхийллээ. Түүний үүсгэн байгуулсан “Most Valuable Promotions” (MVP) агентлаг анхны ММА тэмцээнээ ирэх тавдугаар сарын 16-нд зохион байгуулах гэж байгаа бөгөөд уг үдшийн гол тулаанд Ронда Раузи, Жина Карано нар тулалдаж, Netflix-ээр шууд дамжуулагдах юм.
Жэйк Пол өөрөө удахгүй октагонд хүч үзэх төлөвлөгөөтэй байгаа ч ММА-ийн оршин тогтнолд саад болж буй гол сул талыг олж харсан гэжээ. Тэрээр боксын олон зуун жилийн баялаг түүхтэй харьцуулахад ММА-ийн ирээдүй эргэлзээтэй байгааг онцолсон байна.
Тэрээр ММА-ийн уналтын гол шалтгааныг бөхчүүдийн давамгайлалтай холбон тайлбарлажээ. Жэйк Пол UFC болон түүний удирдлагуудыг шүүмжлэхдээ, ММА нь хэт корпорацийн шинж чанартай, шуналын хэрэгсэл болж байгаа нь нурахад хүргэж байна гэж үзэж байна. “ММА цаг хугацааны шалгуурыг давж чадахгүй байгаагийн шалтгаан нь шилдэг тамирчид нь дандаа бөхчүүд байгаад оршино. Тэд зөвхөн барьцаа авч хэвтсээр байгаад тулааныг уйтгартай болгодог, үүнийг хэн ч үзэхийг хүсэхгүй. Бокс 1500-аад оноос хойш оршин тогтнож байгаа бол ММА ердөө 30 гаруй жил болоод л уруудаж эхэллээ” хэмээн тэрээр ярьжээ.
Хэдийгээр түүний байгууллага Netflix-тэй хамтран ММА-ийн томоохон төсөл хэрэгжүүлж байгаа ч тэрээр спортын бодит байдалд үнэнч байх болно гэдгээ мэдэгдсэн юм. Сүүлийн үед UFC-ээс өндөр чансаатай тулаанчид явах болсон нь үүний нэг жишээ гэж тэрээр үзэж байна. Бөхийн ур чадвар үр дүнтэй ч үзэгчдэд төдийлөн таалагддаггүй нь нууц биш бөгөөд UFC ч үүнийг анхаарч, октагонд цэвэр ялалт, идэвхтэй тулааныг чухалчлах болсон билээ.
