Netflix платформ дээр үзэгчдийн хүртээл болж байсан Жеймс Бондын албан ёсны бүх 25 ангит киноны лицензийн эрх энэ сарын 21-нд дуусгавар болох гэж байна. Энэхүү алхам нь тус стриминг платформ болон Amazon-ы хооронд байгуулсан гурван сарын хугацаатай түүхэн гэрээний дагуу хийгдэж байгаа аж.
Өнгөрсөн хугацаанд Бондын бүх цувралыг нэг дор, нэг платформ дээр байршуулсан нь анхны тохиолдол байсан бөгөөд АНУ, Европ болон Өмнөд Америкийн үзэгчид “007”-ын адал явдлыг бүрэн эхээр нь үзэх боломжтой байв. Энэхүү богино хугацааны хамтын ажиллагааны үр дүнд Даниел Крейгийн тоглосон сүүлийн ангиуд Netflix-ийн “Топ 10” жагсаалтыг тэргүүлж, өндөр хандалт авсан байна. Ердийн үед эдгээр киноны эрх зөвхөн Prime Video-д хадгалагддаг бөгөөд лицензийн хугацаа дууссаны дараа зарим ангиуд тус платформ руу буцах бол бусад нь түрээсийн үйлчилгээнүүдэд шилжих төлөвтэй байна.
Сонирхолтой нь, энэхүү гэрээ дуусгавар болж буй үе нь Жеймс Бондын 26 дахь ангийн бэлтгэл ажилтай давхцаж байгаа юм. Шинэ төслийг “Dune” киногоороо алдаршсан найруулагч Дени Вилнёв найруулж, “Peaky Blinders” цувралын зохиолч Стивен Найт зохиолыг нь бичихээр болсон байна.
Одоогоор шинэ Бондын дүрд хэн тоглох нь тодорхойгүй байгаа ч Аарон Тейлор-Жонсон, Жейкоб Элорди, Каллум Тёрнер, Том Холланд зэрэг жүжигчдийн нэрс хүчтэй яригдаж байгаа юм. Гэсэн хэдий ч найруулагч Вилнёв франчайзыг шинэ шатанд гаргахын тулд төдийлөн олонд танигдаагүй Британи жүжигчнийг эрэлхийлж байгаа тухай мэдээлэл байна.
