Илон Маск OpenAI болон түүний гол хөрөнгө оруулагч Microsoft-ыг өөрийг нь хууран мэхэлсэн хэмээн үзэж, 134 тэрбум ам.доллар болон түүнээс дээш хэмжээний нөхөн төлбөр нэхэмжлэхээр шүүхэд ханджээ. Тэрээр OpenAI-г анх байгуулагдсан ашгийн бус зорилгоосоо няцаж, байгууллагын бүтцийг арилжааны чиглэлд өөрчлөн ашигласан гэж буруутгаж байгаа юм.
Маскийн гаргасан нэхэмжлэлд дурдсанаар, шүүхээр тогтоогдсон нөхөн төлбөрийн мөнгийг OpenAI-ийн ашгийн бус салбарт шилжүүлэх хүсэлтэй байгаагаа илэрхийлжээ. Түүнчлэн OpenAI-ийн гүйцэтгэх захирал Сэм Олтман болон ерөнхийлөгч Грег Брокман нарыг албан тушаалаас нь огцруулж, тэдний олсон бүх ашиг, хөрөнгийг ашгийн бус байгууллагад нь буцаан өгөхийг шаардсан байна.
2015 онд OpenAI-ийг анх байгуулахад Маск хамтран үүсгэн байгуулагчийн хувиар гол хөрөнгө оруулалтыг хийж байсан юм. Гэвч байгууллагын чиг хандлага өөрчлөгдсөний улмаас тэрээр 2018 онд Төлөөлөн удирдах зөвлөлөөс гарч, улмаар 2023 онд өөрийн xAI компанийг байгуулсан билээ. OpenAI нь 2019 онд “хязгаарлагдмал ашигтай” бүтэц рүү шилжиж, өнгөрсөн жилээс бүрэн арилжааны байгууллага болох алхмаа хийсэн бөгөөд энэ оны дөрөвдүгээр улиралд багтан IPO гаргах төлөвтэй байна.
Маскийн үзэж буйгаар, Олтман болон Брокман нар анхнаасаа ашгийн бус байгууллагын нэр хүнд, татварын хөнгөлөлт, хандив зэргийг ашиглан хөрөнгө босгож, нууцаар арилжааны байгууллага болгох төлөвлөгөөтэй байсан гэжээ. Тэрээр шүүхээс энэхүү өөрчлөлтийг хүчингүй болгохыг хүсэж байгаа ч зарим эх сурвалжуудын мэдээлснээр Маск өөрөө ч 2017 онд компанийг арилжааны бүтэц рүү шилжүүлэх хэлэлцээрт оролцож, удирдлагын давамгай эрхийг шаардаж байсан гэх мэдээлэл бий.
Энэхүү дуулиантай хэргийн шүүх хурал энэ сард болох бөгөөд талуудын тэмцэл улам хурцадаж байна. Саяхан OpenAI-ийн зүгээс Маск болон Meta компанийг өөрсдийнх нь эсрэг зохион байгуулалттай дайралт хийсэн хэмээн буруутгаж, Делавэр болон Калифорнийн Ерөнхий прокуроруудад хандан шалгалтын хүсэлт гаргаад байна.
