Теренс Кроуфорд зодог тайлж, Канело Альварес жин өгссөнөөр эзэнгүй орхигдсон супер дунд жингийн дэлхийн аваргын бүсүүдийн төлөөх тулаанууд эрчимжиж эхэллээ. Энэ долоо хоногт тус дивизионы хувь заяаг тодорхойлох чухал тулаанууд болж байна.
Кубын боксчин, 14 тулааныхаа 13-т нь хүнд цохилтоор ялалт байгуулаад буй Ослэс Иглесиас өчигдөр буюу пүрэв гарагт Павел Силягинтай IBF бүсний төлөө тулалдлаа. Тус жиндээ “айдас” гэгдэх болсон Иглесиас энэхүү боломжийг ашиглан дэлхийн аваргын бүсийг эзэмшиж, өөрийгөө шилдэг боксчин гэдгээ батлан харууллаа. Тэрээр тулааны өмнө “Надад зохих ёсоор нь ирсэн боломжийг би авах бөгөөд энэ бүс минийх байх болно” хэмээн итгэл төгс мэдэгдэж байсан юм.
Түүний өрсөлдөгч Павел Силягин нь дэлхийн чансааны 7-д бичигддэг, туршлагатай, урьд өмнө нь ялагдашгүй гэгдэж байсан Пабло Эзекиел Корзог буулган авч байсан хүчирхэг тамирчин байв. Гэсэн хэдий ч “Eye of the Tiger Promotions”-ийн ерөнхийлөгч Камиль Эстефан Иглесиасын авьяас чадварыг онцгойлон тэмдэглэж, түүнийг зөвхөн супер дунд жинд төдийгүй дэлхийн шилдэг (pound-for-pound) боксчдын нэг болох ирээдүйтэй гэж үнэлжээ.
Одоогоор супер дунд жингийн бусад бүсүүдийн төлөөх өрсөлдөөн ч ид өрнөж байна. Тухайлбал, Хамза Шираз болон Алема Бегич нар WBO бүсний төлөө тулалдахаар товлогдсон бол WBC-ийн аварга Кристиан Мбили Канело Альварестай тулалдах магадлалтай байна. Мөн WBA-ийн аварга Хосе Армандо Ресендиз ирэх тавдугаар сард Хайме Мунгуятай хүч үзэхээр бэлтгэж байна.
Камиль Эстефаны зүгээс өөрийн харьяа тамирчид болох Иглесиас болон Кристиан Мбили нарын хооронд бүс нэгтгэх тулаан зохион байгуулах хүсэлтэй байгаагаа илэрхийлсэн. Энэхүү шинэ оддын гарч ирж буй давалгаа нь Кроуфордоос хойш нам гүм болоод байсан супер дунд жинг дахин амь оруулж, үзэгчдийн сонирхлыг татаж эхэллээ.
