Энэ долоо хоногт болох Тайсон Фьюри болон Арсланбек Махмудов нарын тулааны өмнөх гол тулаанд Конор Бенн, Режис Програйс нар 150 фунт жинд учраа тааран тулалдахаар товлогдоод байна. Тулааны өмнө экс аварга Режис Програйс “хүнд бэртэлтэй” байгаа тул тулаанаас татгалзаж магадгүй гэсэн цуу яриа гарсан ч 37 настай боксчин эцсийн мөчид рингэнд гарахаар шийджээ.
Конор Бенн энэ талаар “Boxing News” сэтгүүлд ярихдаа өрсөлдөгчийнхөө бэртэлд огт санаа зовохгүй байгаагаа илэрхийллээ. Тэрээр 2025 онд Крис Юбанк Жр-тэй хийсэн цуврал тулаанаас хойш анх удаа рингэнд эргэн ирж буй бөгөөд “Тэр бэртэлтэй эсэх нь миний асуудал биш. Хэрэв үнэхээр бэртэлтэй байж тулалдахаар шийдсэн бол энэ нь түүний хувьд ухаалаг алхам биш байх. Гэхдээ тэр энэ тулаанаас их хэмжээний мөнгө авч байгаа. Бэртэлтэй байсан ч, үгүй байсан ч тулааны үр дүн өөрчлөгдөхгүй, би ялах болно” хэмээн өөртөө итгэлтэй мэдэгдсэн байна.
Энэхүү сонирхолтой тулааны үдшийг “Netflix” платформоор дэлхий даяар шууд дамжуулах юм. Мөн тус үдэш Британийн хүнд жингийн аварга шалгаруулах тулаанд Жеми ТКВ болон Ричард Риакпорхе нар хүч үзэхээс гадна Жустис Хуни, Фрейзер Кларк нарын тулаан олны анхаарлыг татаж байна. Түүнчлэн Конор Бенн энэхүү тулаанд ялснаар өөрийн карьераа ахиулж, дэлхийн аваргын бүсийн төлөөх тулаанд ойртох зорилготой байгаа ажээ.
