Европын Конференц лигийн шөвгийн наймын эхний тоглолтод учраа таарсан Английн Кристал Палас болон Италийн Фиорентина багууд гарааны бүрэлдэхүүнээ албан ёсоор зарлалаа. Кристал Палас баг өмнөх шатанд Кипр улсад болсон тоглолтын нэмэлт цагт Исмаила Саррын оруулсан шийдвэрлэх гоолын ачаар шалгарсан бол Фиорентина баг Раков Ченстоховаг хүндхэн тоглолтын эцэст буулган авч, шөвгийн наймд үлдээд байгаа юм.
Талбайн эзэн Кристал Палас багийн гарааны бүрэлдэхүүнд гурван томоохон өөрчлөлт орсон байна. Багийн ахлагч Дин Хендерсон хаалгаа манахаар гарсан бол хажуугийн хамгаалалтад Даниэл Муноз багтжээ. Мөн нэгдүгээр сарын 25-наас хойш анх удаа довтлогч Жан-Филипп Матета гарааны бүрэлдэхүүнд нэрлэгдлээ. Гэсэн хэдий ч довтлогч Эдди Нкетиа болон өвдөгний бэртэлтэй байгаа хагас хамгаалагч Чейк Дукуре нар энэ удаагийн тоглолтыг өнжиж байна.
Зочин баг болох Фиорентинагийн хувьд довтлогч Роберто Пикколи Мойзе Кэнийн оронд тоглолтыг эхлүүлэхээр болсон бол хамгаалагч Додо Пьетро Комуццог орлон талбайд гарна. Италийн багт бэртэл гэмтлийн асуудал нэлээдгүй байгаа бөгөөд хамгаалагч Тарик Лампти, Фабиано Париси, Никколо Фортини нараас гадна хагас хамгаалагч Манор Соломон болон шагайн бэртэлтэй Мойзе Кэйн нар бүрэлдэхүүнд багтаагүй юм. Хоёр багийн тоглолт Кристал Палас багийн талбайд явагдах бөгөөд Европын тавцанд хэн нь давуу тал олж авахыг хөлбөмбөг сонирхогчид анхааралтай ажиглаж байна.
