АНУ-ын Агаарын цэргийн хүчний түүхэн дэх хамгийн өвөрмөц, хүчирхэг техникүүдийн нэг болох A-10 Thunderbolt II буюу олны нэрлэж заншсанаар “Warthog” онгоц 1970-аад оноос хойш өнөөдрийг хүртэл үйлчилгээнд байсаар байна. Анх Зөвлөлтийн танкуудыг устгах зорилгоор Вьетнамын дайны туршлага дээр үндэслэн бүтээгдсэн энэхүү онгоц нь 2026 оны Ойрхи Дорнодын мөргөлдөөнд ч өөрийн үүргээ гүйцэтгэсээр байгаа юм.
1970 онд АНУ-ын Агаарын цэргийн хүчин “A-X” төслийг зарлаж, Fairchild Republic компанийн загварыг сонгосноор A-10 онгоцны түүх эхэлсэн байдаг. 1984 он хүртэл нийт 713 ширхэг үйлдвэрлэгдсэн бөгөөд тухайн үеийн нэгж бүрийн өртөг 18 сая ам.доллар байсан бол өнөөгийн ханшаар энэ нь 70 сая орчим ам.доллартай тэнцэж байна. Сүүлийн жилүүдэд хийгдсэн технологийн шинэчлэлүүдийн ачаар өдгөө 260-280 орчим онгоц ашиглагдах боломжтой хэвээр байгаа юм.
A-10 онгоцны гол цөм нь түүний хамарт байрлах 30 мм-ийн GAU-8/A Avenger гатлингийн их буу юм. Секундэд 65 сум харвах чадалтай энэхүү их буу нь ямар ч төрлийн хуягт техник болон байгууламжийг устгах зориулалттай. Анх General Electric компани үйлдвэрлэж эхэлсэн уг зэвсгийг 1990-ээд оноос хойш General Dynamics компани хариуцан хөгжүүлж байна.
“Warthog” нь 1991 оны Персийн булангийн дайны үеэр 8,100 гаруй нислэг үйлдэж, AGM-65 Maverick пуужингийн нөөцийн 90%-ийг байг устгахад ашиглаж байсан алдартай түүхтэй. Хэдийгээр АНУ-ын Агаарын цэргийн хүчин энэхүү хуучирсан загварыг зэвсэглэлээс хасах санал удаа дараа гаргаж байсан ч Конгресс түүний ач холбогдлыг өндрөөр үнэлж, ашиглах хугацааг нь сунгасаар ирсэн юм. Сүүлийн үед Ойрхи Дорнод болон Төв Азийн бүс нутагт үүссэн хурцадмал байдалтай холбогдуулан АНУ-ын цэргийн хүчин A-10 онгоцыг эрэг орчмын хурдтай хөдөлж буй жижиг хөлөг онгоцнууд болон газрын хөдөлгөөнт байнуудыг устгахад дахин идэвхтэй ашиглаж эхлээд байна. Энэ нь уг онгоц хагас зуун жил өнгөрсөн ч орчин үеийн дайны талбарт хэрэгцээтэй хэвээр байгааг баталж байна.
