АНУ-ын зэвсэгт хүчин Иран улсын “Шахед-136” (Shahed-136) камикадзе нисгэгчгүй онгоцны загвар дээр суурилан бүтээсэн LUCAS (Low-Cost Uncrewed Combat Attack System) хэмээх урт тусгалтай нисгэгчгүй онгоцоо “Epic Fury” ажиллагааны үеэр анх удаа амжилттай туршиж, байлдааны талбарт ашиглаж эхэллээ. LUCAS нь Ираны загварыг “урвуу инженерчлэл” буюу задлан шинжлэх аргаар хуулбарлан бүтээсэн бөгөөд нэг бүрийн өртөг нь ердөө 35,000 ам.доллар орчим юм. Энэ нь АНУ-ын уламжлалт зэвсэглэлд ашиглагддаг 2 сая гаруй ам.долларын өртөгтэй “Томахок” пуужингуудтай харьцуулахад асар хямд бөгөөд олноор үйлдвэрлэх боломжтой “хямд өртөгтэй масс” стратегийн нэг хэсэг болж байна.
АНУ-ын Батлан хамгаалах яамны албан тушаалтан асан Майкл С.Хоровицын хэлснээр, LUCAS-ийг ердөө 18 сарын дотор хөгжүүлж, ашиглалтад оруулсан нь Пентагоны хувьд маш богино хугацаанд хийгдсэн амжилттай ажил болжээ. Украинд ашиглагдаж буй Ираны “Шахед” онгоцнуудын үр нөлөөг ажигласны үндсэн дээр АНУ ийм төрлийн зэвсэг өөрт нь ч хэрэгтэй болохг хүлээн зөвшөөрсөн юм. LUCAS нь Ираны эх загвараас хэд хэдэн давуу талтай бөгөөд үүнд зөвхөн GPS-д найдахын оронд объект таних систем ашиглан байг илүү нарийвчлалтай онох чадвар, мөн мэдрэгч эсвэл харилцаа холбооны дамжуулагч болгон ашиглах олон талт байдал багтаж байна.
АНУ-ын Төв командлал (CENTCOM) энэхүү онгоцыг байлдааны нөхцөлд “салшгүй чухал” хэмээн үнэлсэн. Учир нь хямд өртөгтэй онгоцуудыг олноор ашигласнаар дайсны үнэтэй агаараас хамгаалах системийг сульдуулах, нөөцийг нь шавхах боломжтой болдог. Энэхүү технологийн амжилт нь зөвхөн Ойрхи Дорнодод бус, цаашид Тайванийн хоолой орчимд БНХАУ-тай үүсэж болзошгүй мөргөлдөөнд АНУ-ын “Hellscape” стратегийн гол цөм болох төлөвтэй байна. LUCAS нь АНУ-ын батлан хамгаалах салбар өндөр технологийн үнэтэй зэвсгээс гадна, хямд бөгөөд олон тооны зэвсэгт тулгуурласан шинэ үеийн дайны тактикт шилжиж байгааг баталлаа.
