Олон нийтийн анхаарлын төвд буй Коннор Бенн болон Режис Прогрейс нарын тулаан болох эсэхэд эргэлзээ төрүүлж байсан цуу яриа эцэстээ цэгцэрч, тулаан товлосон ёсоор болохоор боллоо. Энэхүү сонирхолтой тулаан маргааш буюу 2026 оны 4-р сарын 11-ний Бямба гарагийн орой Лондон хотын “Тоттенхэм Хотспур” цэнгэлдэх хүрээлэнд Тайсон Фьюри болон Арсланбек Махмудов нарын хүнд жингийн тулааны өмнөх гол үйл явдал болон зохион байгуулагдах юм.
Энэхүү тулаан нь 150 фунт жингийн хязгаарт болох бөгөөд хоёр тамирчны хувьд хоёуланд нь томоохон сорилт болж байна. Коннор Бенн 2025 оны 11-р сард Крис Юбанк Жр-тэй тулалдаж ялснаасаа хойш анх удаа рингэнд гарч байгаа бөгөөд өөрийн үндсэн жин болох велтервэйт рүү эргэн ирэх бэлтгэлээ базааж байна. Харин дэлхийн хоёр удаагийн аварга Режис Прогрейсийн хувьд карьерынхаа хамгийн дээд жинд хүч үзэх гэж буй нь энэ юм.
Сүүлийн өдрүүдэд 37 настай Режис Прогрейсийг бэлтгэлийн үеэр бэртэл авч, тулаанаас татгалзаж магадгүй гэх мэдээлэл цахим орчинд эрчтэй тархсан ч тэрээр хэвлэлийн бага хурал дээр үүнийг эрс үгүйсгэсэн. Прогрейс IFL TV-д өгсөн ярилцлагадаа өрсөлдөгчийнхөө талыг тулааныг цуцлуулахын тулд “бохир тоглоом” тоглож, бэртлийн цуу яриаг зориуд тараасан байж магадгүй хэмээн хардаж байгаагаа хэлээд, хэрэв тулаан сүүлийн мөчид цуцлагдвал “Орлон тоглогч хэдийнэ бэлэн байгаа” гэж дурдсан нь олны анхаарлыг татаж байна.
“Устгагч” хочит Коннор Бенн болон “Ругару” хочит Режис Прогрейс нарын тулааныг дэлхий даяар Netflix платформоор шууд дамжуулан үзүүлэх бөгөөд энэ нь тус платформын спортын томоохон контентуудын нэг болж байна. Тулаан Бямба гарагийн орой орон нутгийн цагаар 22:00 цагт эхлэх бөгөөд Коннор Бенн 147 фунт жинд эргэн ирэхдээ том амжилт үзүүлэх зорилготой байгаагаа илэрхийлжээ.
