Хятад улс сүүлийн арван жилд хөлөг онгоцны гурван томоохон үйлдвэрээ шинэчлэхэд асар их хөрөнгө оруулалт хийсэн нь Type 093B зэрэг дэвшилтэт ангиллын шумбагчуудыг олноор үйлдвэрлэх нөхцөлийг бүрдүүлжээ. Цаашлаад энэ арван жилийн сүүлээр ашиглалтад орох Type 095 болон Type 096 ангиллын хөлгүүд нь АНУ-ын нутаг дэвсгэрт цөмийн цохилт өгөх чадвартай баллистик пуужингаар тоноглогдох юм. Хэдийгээр үйлдвэрлэлийн тоо хэмжээ хурдацтай өсөж байгаа ч чанар, аюулгүй байдлын асуудал анхаарал татсан хэвээр байна. Тухайлбал, 2024 онд Type 041 Zhou ангиллын шинэ шумбагч онгоцны анхны загвар үйлдвэрийнхээ зогсоол дээр живсэн үйл явдал болсон бөгөөд АНУ-ын Батлан хамгаалах яамны тайланд үүнийг батлан хамгаалах салбар дахь авлига, хяналтын тогтолцоо сул байгаатай холбон тайлбарлажээ.
Түүнчлэн Хятадын шумбагч онгоцуудын дуу чимээний түвшин буюу нууцлаг байдал нь АНУ-ынхтай харьцуулахад сул тал хэвээр байгаа ч үйлдвэрлэлийн асар их цар хүрээ нь давуу тал болон хувирч байна. АНУ-ын шумбагч хүчний командлагч, дэд адмирал Ричард Сийфын мэдэгдсэнээр, 2040 он гэхэд Хятадын флот бүс нутгийн далайн ноёрхолд бодит аюул учруулахаар байна. Энэ нь Номхон далайн бүс нутаг дахь цэргийн тэнцвэрт байдлыг үндсээр нь өөрчилж, АНУ-ын тэнгисийн давамгайлалд томоохон сорилт учруулах магадлалтай юм. Хятадын энэхүү шинэчлэл нь зөвхөн тооны хувьд бус, цөмийн хүчин чадлын хувьд ч дэлхийн хэмжээний тоглогч болох гэсэн амбицыг нь илтгэж байна.
