Майами хотноо зохион байгуулагдсан “UFC 327” тэмцээний оргил тулаанд Чехийн тулаанч Жири Прохазка болон Шинэ Зеландын Карлос Улберг нар хагас хүнд жингийн аваргын бүсний төлөө хүч үзлээ. Тулааны явцад Улберг хөлөндөө хүнд бэртэл авч, бараг зогсох аргагүй болсон ч Прохазка өрсөлдөгчөө өрөвдөж, тулааныг дуусгах боломжийг ашиглаагүй нь түүнийг ялагдалд хүргэсэн гэнэтийн үйл явдал боллоо.
Тулааны эхний хагаст Прохазка илт давуу байж, Улбергийн хөлийг онилсон цохилтуудыг амжилттай гүйцэтгэж байв. Улберг нэг хөл дээрээ тогтож ядан, торны хажууд ухарч байх үед Прохазка түүнийг гүйцээхийн оронд босож тулалдахыг уриалж, хүлээзнэсэн нь стратегийн том алдаа болсон юм. Энэхүү эгзэгтэй мөчийг Улберг ашиглаж, торны хажуугаас хүчирхэг зүүн гарын цохилтыг Прохазкагийн эрүүнд цэвэрхэн буулгаснаар нокаутаар ялалт байгуулж, UFC-ийн хагас хүнд жингийн шинэ аварга болов.
Тулааны дараа Жири Прохазка өөрийн гаргасан алдаандаа харамсаж, “Би түүнийг өрөвдсөн. Энэ бол миний амьдралын хамгийн том сургамжуудын нэг боллоо. Би ялчихсан байсан тулаанаа өөрөө алдчихлаа” хэмээн мэдэгдсэн юм. Тэрээр Майамигийн эмнэлэгт хацрын ясаа шалгуулсныхаа дараа Инстаграм хуудсаараа дамжуулан шүтэн бишрэгчдээсээ уучлалт гуйж, дахин даагаа нэхэх хүсэлтэй байгаагаа илэрхийлжээ. Энэхүү ялагдлаар Прохазкагийн аваргын бүсний төлөөх тулааны амжилт 1-3 болон ухарлаа.
