“Чикаго Буллз” багийн ерөнхий дасгалжуулагч Билли Донован улирлын сүүлийн тоглолтынхоо өмнө багийн удирдлагуудтай уулзаж, ирэх улиралд хамтран ажиллах эсэхээ шийдвэрлэхээр болжээ. Баасан гарагт өгсөн ярилцлагадаа тэрээр баг нь “эргэлтийн цэг”-т ирснийг онцлоод, цаашид үлдэх эсэхээ одоогоор тодорхой хэлж чадахгүй байгаагаа илэрхийлсэн байна.
Донован “Би Чикаго хот болон багийнхаа үйл ажиллагаанд маш их дуртай. Гэхдээ одоо бүх зүйл өөрчлөгдсөн, бид эргэлтийн цэг дээрээ ирээд байна. Тиймээс бид бүгдээрээ хаана байгаагаа, цаашид хэрхэн урагшлахаа ойлгохын тулд нүүр тулж ярилцах шаардлагатай” хэмээн Даллас хотноо сэтгүүлчдэд ярьжээ.
Өнгөрсөн долоо хоногт “Буллз” багийн гүйцэтгэх дэд ерөнхийлөгч Артарас Карнишовас болон ерөнхий менежер Марк Эверсли нарыг ажлаас нь чөлөөлсөн нь багт томоохон өөрчлөлт гарч буйн илрэл юм. Хэдийгээр багийн ерөнхийлөгч Майкл Рейнсдорф Донованыг үргэлжлүүлэн ажиллуулахыг дэмжиж байгаа ч, дасгалжуулагчийн зүгээс багийн шинэ төлөвлөгөө, тогтвортой байдлыг чухалчилж байгаа аж.
Билли Донован сүүлийн зургаан улирлын турш “Бухнууд”-ыг удирдаж, 226 хожил, 255 хожигдолтой амжилт үзүүлээд байгаа юм. Түүнийг өмнө нь Хойд Каролинагийн их сургуулийн дасгалжуулагчийн албанд очиж магадгүй гэсэн таамаг байсан ч тус албан тушаалыг Майкл Мэлоун хашихаар болсон билээ. Ийнхүү ирэх долоо хоногт болох уулзалт “Чикаго Буллз” багийн ирэх жилүүдийн өнгө төрхийг тодорхойлох нь ээ.
