Английн хүнд жингийн боксчин Фабио Уордли өөрийн эзэмшиж буй дэлхийн аваргын бүсээ хамгаалах анхны тулаандаа бэлдэхийн зэрэгцээ ирээдүйн төлөвлөгөөгөө хуваалцлаа. WBO холбооны “Interim” буюу түр аваргын төлөөх тулаанд Жозеф Паркерыг ялж байсан тэрээр Александр Усик бүсээсээ татгалзсаны дараа WBO-гийн жинхэнэ аваргаар нэрлэгдсэн билээ.
Уордлигийн хамгийн ойрын зорилго бол ердөө нэг сарын дараа болох Даниел Дюбуастай хийх тулаан юм. Хэрэв тэрээр энэхүү хүнд сорилтыг давж чадвал Александр Усиктай тулалдах том боломж нээгдэх боловч Уордли өөр нэг сонирхолтой хувилбарыг дэвшүүлж байна. Тэрээр АНУ-ын зах зээлд хүч үзэж, WBC-ийн аваргын бүсийг удаан хугацаанд эзэмшсэн, домогт Деонтей Уайлдертай нударга зөрүүлэхийг хүсэж байгаагаа илэрхийлжээ.
“Хүрэл бомбардлагч” хочит Деонтей Уайлдер бол боксын түүхэн дэх хамгийн аймшигтай цохилттой тамирчдын нэг бөгөөд 45 ялалтынхаа 43-ыг нь хүнд нокаутаар авсан үзүүлэлттэй. Нөгөө талд Фабио Уордли ч дутахааргүй “KO artist” буюу нокаутчин бөгөөд 20 тулааны 19-ийг нь хугацаанаас нь өмнө дуусгасан юм. Уордли хэлэхдээ “Уайлдертай хийх тулаан болвол жинхэнэ гал гарна. Би түүний хүчийг хүндэлж байгаа ч өөрийнхөө шийдэмгий ялалтад бүрэн итгэлтэй байна” хэмээжээ.
Гэхдээ Уайлдерын талаарх яриа бодит ажил хэрэг болохын тулд Уордли ирэх дөрвөн долоо хоногийн дараа Дюбуастай хийх тулаанд бүх анхаарлаа хандуулах ёстой. Шинжээчид энэхүү тулааныг хэн нь ч ялж болох тун эгзэгтэй өрсөлдөөн хэмээн дүгнэж байгаа бөгөөд Уордлигийн хувьд дэлхийн хэмжээний супер ододтой тулалдах зам нь энэ ялалтаас шууд хамаарах юм.
