Унгар улсад болсон түүхэн сонгуулийн үр дүнд Петер Мажарын удирдсан төв үзэл баримтлагч нам үнэмлэхүй ялалт байгуулж, Виктор Орбаны олон жил үргэлжилсэн засаглалыг эцэс болголоо. Энэхүү өөрчлөлт нь Европын геополитикт шинэ хуудас нээж байгаа бөгөөд шинэ Ерөнхий сайд ОХУ-тай харилцах байр сууриа албан ёсоор тодорхойлов.
Петер Мажар ОХУ-ын Ерөнхийлөгч Владимир Путинтай шаардлагатай тохиолдолд хэлэлцээ хийхэд бэлэн байгаагаа мэдэгдсэн ч өмнөх удирдлага шиг “ойрын холбоотон” болохгүй гэдгээ хатуу санууллаа. Тэрээр “Бид бодит нөхцөл байдалд тулгуурлан хэлэлцээ хийх болно, гэхдээ бид найз нөхөд болохгүй” хэмээн онцлон тэмдэглэсэн байна.
Мажарын нам парламентад хоёр гуравны хоёрын олонхийг авсан нь Виктор Орбаны “Fidesz” намын хувьд томоохон цохилт болоод зогсохгүй түүний гол холбоотнууд болох Владимир Путин болон АНУ-ын Ерөнхийлөгч Дональд Трамп нарт ч нөлөөлөхөөр байна. Кремлийн зүгээс Унгарын сонгогчдын шийдвэрийг хүндэтгэж буйгаа мэдэгдээд, шинэ удирдлагатай “бодит харилцааг хадгалах” хүсэлтэй байгаагаа илэрхийлжээ.
Европын Холбооны гишүүн орнууд болон Украин улс Унгарт болсон сонгуулийн үр дүнг сайшааж, Франц, Герман зэрэг орнууд Мажарыг ЕХ-той харилцаагаа бэхжүүлэхийг уриалсан байна. Украины Ерөнхийлөгч Владимир Зеленский Мажартай Европын энх тайван, аюулгүй байдлыг хангахын төлөө хамтран ажиллах амлалт өглөө.
Унгар улс Оросын газрын тосноос ихээхэн хамааралтай хэвээр байгааг Петер Мажар хүлээн зөвшөөрсөн юм. “Бид газарзүйн байршлаа өөрчилж чадахгүй. Энергийн хамаарал удаан хугацаанд үргэлжлэх тул бид нөөцөө төрөлжүүлэх хэрэгтэй. Гэхдээ энэ нь нэг шөнийн дотор шийдэгдэх асуудал биш” гэж тэрээр бодит нөхцөл байдлыг тайлбарлажээ. Ийнхүү Унгар улс Европын Холбоо болон НАТО-гийн хүрээнд илүү идэвхтэй, нэгдмэл байр суурьтай ажиллах шинэ үе рүү шилжиж байна.
