Allbirds компани саяхан нүүрэн дээрээ зурагтай шинэ “canvas cruiser” цуглуулгаа танилцуулсан ч, ердөө долоо хоногийн дараа буюу 4-р сарын 15-нд бизнесийн чиглэлээ хиймэл оюун ухааны (AI) тооцоолох дэд бүтэц рүү бүрэн өөрчилнө гэдгээ мэдэгдлээ.
Өнгөрсөн гуравдугаар сарын 30-нд тус компани дотоодын борлуулалт нь төдийлөн амжилттай болоогүй тул өөрийн оюуны өмчийг American Exchange Group-т 39 сая ам. доллараар худалдсан юм. Одоо Allbirds нь 50 сая ам.долларын хөрөнгө оруулалтаар өндөр хүчин чадалтай GPU (Graphics Processing Unit) худалдан авч, “GPU-as-a-Service” (GPUaaS) болон AI-д зориулсан цахим шийдэл нийлүүлэгч компани болох зорилт тавьжээ. Үүнтэй холбогдуулан компанийн нэрээ NewBird AI болгон өөрчлөхөөр болсон байна.
Бусад салбарын компаниуд ч мөн тооцоолох хүчин чадлыг нэмэгдүүлэх чиглэлд анхаарлаа хандуулж эхлээд байна. Жишээ нь, Boom Supersonic компани AI компаниудад дата төвийн эрчим хүчний эх үүсвэр болгон өөрийн хийн турбиныг санал болгож байгаа бол Bitcoin олборлогч компаниуд AI-тай холбоотой тооцоолох чадварт хөрөнгө оруулаад удаж байгаа юм.
AI-д зориулсан тооцоолох хүчин чадлын эрэлт маш өндөр байгаа нь энэ шилжилтийн гол шалтгаан болж байна. NewBird AI-ийн зүгээс “Аливаа байгууллага, AI хөгжүүлэгчид болон судлаачид цар хүрээтэй AI бүтээх, сургах, ажиллуулах тооцоолох нөөцөөр дутагдаж байгаа бөгөөд бид үүнийг шийдвэрлэхэд туслана” гэж мэдэгдлээ.
Энэхүү шилжилтийн талаар хувьцаа эзэмшигчдийн эцсийн зөвшөөрөл хэрэгтэй байгаа ч хөрөнгө оруулагчид уг мэдээг туйлын эергээр хүлээж авчээ. Allbirds-ийн хувьцаа 400 хувиар өссөн нь AI-ийн одоогийн хөөрөгдлийг илтгэхээс гадна уламжлалт бүтээгдэхүүн үйлдвэрлэгч компаниуд технологийн процессор руу хүч түрэн орж байгааг харуулж байна.
