Хятадын судалгааны хөлөг онгоц далайн ёроолд байрлах харилцаа холбооны кабелийг таслах чадвартай шинэ төхөөрөмжийг амжилттай туршсан нь олон улсын аюулгүй байдлын шинжээчдийн болгоомжлолыг төрүүлж байна. Энэхүү технологи нь 3,500 метрийн гүнд ажиллах чадвартай бөгөөд дэлхийн интернетийн сүлжээний гол тулгуур болсон далайн доорх дэд бүтцэд шууд заналхийлэх эрсдэлтэй юм.
Хятадын “Haiyang Dizhi 2” хэмээх шинжлэх ухааны судалгааны хөлөг онгоц 11,483 фунт буюу 3,500 метрийн гүнд уг туршилтыг гүйцэтгэжээ. 150 тонн даацтай кранаар тоноглогдсон тус хөлөг нь өмнө нь гүн усанд алсын удирдлагатай төхөөрөмжүүдийг (ROV) ашиглан нарийн төвөгтэй ажиллагаа явуулж чаддагаа харуулж байсан юм.
“China Science Daily” сонинд мэдээлснээр, энэхүү туршилт нь гүн усны тоног төхөөрөмжийг хөгжүүлэлтийн шатнаас инженерчлэлийн бодит хэрэглээнд шилжүүлэх “сүүлчийн алхмыг” амжилттай хийсэн байна. Гэвч энэ нь зөвхөн шинжлэх ухааны ололт бус, харин геополитикийн зөрчилдөөний үед стратегийн чухал ач холбогдолтой дэд бүтцийг устгах хэрэгсэл болох аюултайг мэргэжилтнүүд онцолж байна.
Сүүлийн жилүүдэд Балтийн тэнгисээс Номхон далай хүртэлх усан доорх харилцаа холбоо болон цахилгааны кабельтай холбоотой сэжигтэй гэмтлүүд ихсэх болсон. Хятадын энэхүү шинэ төхөөрөмж нь далайн ёроолын аюулгүй байдлын эмзэг байдлыг улам хурцатгаж, улс орнуудын мэдээллийн аюулгүй байдалд шинэ түвшний сорилт бий болгож байна.
