Иран дахь мөргөлдөөнөөс үүдэлтэй дэлхийн эрчим хүчний хямрал нь Ази болон Африк тивийн орнуудыг цөмийн эрчим хүчний үйлдвэрлэлээ эрс нэмэгдүүлэхэд хүргэж байна. Газрын тос, байгалийн хийн хангамжийн тасалдал нь Ази, Африк төдийгүй АНУ, Европт эрчим хүчний үнийг огцом өсгөсөн нь урьд өмнө нь ийм төрлийн хөтөлбөргүй байсан орнуудыг ч цөмийн эрчим хүчийг сонгоход түлхэц боллоо.
Цөмийн эрчим хүчний салбарт хөрөнгө оруулалт хийх нь одоогийн хямралыг богино хугацаанд шийдвэрлэхгүй ч, урт хугацаандаа байгалийн түлшний үнийн хэлбэлзлээс хамгаалах стратегийн чухал алхам болоод байна. Үүний хүрээнд Өмнөд Солонгос, Тайвань, Япон зэрэг Азийн улсууд цөмийн эрчим хүчний үйлдвэрлэлээ нэмэгдүүлж, зогсоод байсан реакторуудаа дахин ажиллуулахаар төлөвлөж эхэлжээ.
Африк тивийн хувьд Кени, Руанда, Өмнөд Африк зэрэг улсууд шинэ реактор барих хөтөлбөрүүдээ идэвхтэй дэмжиж байна. Цөмийн энерги нь нүүрсхүчлийн хий ялгаруулдаггүй тул цаг уурын өөрчлөлттэй тэмцэхэд ач холбогдолтой ч, цөмийн хаягдлын асуудал олон улсын анхаарлын төвд байсаар байна.
Олон улсын цөмийн энергийн агентлагийн мэдээлснээр, өдгөө дэлхийн 31 улс цөмийн эрчим хүч ашиглаж байгаа нь нийт цахилгаан эрчим хүчний 10 орчим хувийг бүрдүүлж байна. Цаашид 40 гаруй улс энэхүү технологийг нэвтрүүлэхээр бэлтгэж байгаа бөгөөд АНУ, ОХУ зэрэг гүрнүүд Африк тивд нөлөөгөө тогтоохын тулд бага хэмжээний модулиар реактор (SMR) зэрэг шилдэг технологиудаа санал болгож эхэлжээ.
