Жүжигчин Педро Паскаль “Super Bowl LX”-ийн хагас цагийн шоуны үеэр латин Америкийн супер од Bad Bunny-той хамт тайзнаа гарсан хөгжилтэй түүхээ “Fantastic Man” сэтгүүлд өгсөн ярилцлагадаа хуваалцжээ. Тэрээр энэхүү түүхэн тоглолтод оролцоно гэдгээ үзүүлбэр эхлэхээс ердөө хэдхэн минутын өмнө л мэдсэн байна.
“The Last of Us” киноны од Паскаль өөрөө Bad Bunny-ийн багтай холбогдож, энэхүү үйл явдалд ямар нэгэн байдлаар оролцох, бүр сайн дураараа кофе зөөхөд ч бэлэн байгаагаа илэрхийлж байжээ. Тэрээр “Одоогоор Бенито шиг соёлын төлөөлөл болж, баяр ёслолыг ийм өндөр түвшинд зохион байгуулж чадах хүн байхгүй. Би түүний дуунд дуртай төдийгүй, түүний хийж буй зүйлс надад маш их урам зориг өгдөг” хэмээн ярьжээ.
Паскаль “Behemoth!” киноны зураг авалтын үеэр өөрийн нэгэн инээдтэй зургаа Bad Bunny-ийн баг руу илгээж, “Энэ үнэхээр би байна шүү” гэж бичсэнээс ердөө 25 минутын дараа урилга хүлээн авсан байна.
Гэсэн ч тэрээр тоглолтын өдөр хүртэл өөрийгөө тайзан дээр гарна гэж төсөөлөөгүй байжээ. Түүнд зөвхөн “цайвар өнгөтэй хувцас өмсөөрэй” гэсэн заавар өгсөн тул тэрээр өөрийгөө зүгээр л зочдын суудалд сууна гэж бодож байв. Паскаль энэ тухайгаа: “Бид талбай дээр тоглолт үзэж байтал хэн нэгэн намайг суудлаас маань босгоод тайзны ард аваачсан. Тэнд Cardi B, Young Miko, Karol G, Jessica Alba нар байсан. Тэд хувцас шалгаад шууд л ‘За, чи бүжиглэх болно’ гэж хэлсэн” хэмээн дурсжээ.
Тэрээр Bad Bunny-ийн тайзны “La Casita” хэсэгт гарах болсноо ойлгох тэр мөчид “Бурхан минь, би Каситад гарах нь байна шүү дээ” гэж бодож байсан гэнэ. Талбай руу гарах үедээ тэрээр маш их гайхсан байсан тул “гэрэлтүүлгэнд өртсөн буга шиг” харагдсан байж магадгүй хэмээн хошигносон байна.
