“Stranger Things” цувралыг бүтээгч ах дүү Дафферуудын төгссөн Чапмэн их сургуулийн Додж (Dodge) кино, медиа урлагийн коллеж хиймэл оюун ухаант (AI) жүжигчин Тилли Норвудыг (Tilly Norwood) урьж лекц хийлгэсэн нь оюутан, төгсөгчдийн дунд томоохон эсэргүүцэл дагууллаа.
2025 онд “мэндэлсэн” тус AI жүжигчин нь Холливудын SAG-AFTRA үйлдвэрчний эвлэл болон салбарын мэргэжилтнүүдээс багагүй шүүмжлэл хүртээд байсан юм. Коллежийн зүгээс AI жүжигчнийг сурталчилсан нь бүтээлч салбарын ирээдүйд аюул учруулж буй хариуцлагагүй үйлдэл гэж оюутнууд үзэж байна. Додж коллежийн Instagram хуудсанд тавигдсан танилцуулгын доор “Аймаар, хариуцлагагүй”, “Бидэнд AI-гийн хог хэрэггүй” гэх мэт эсэргүүцсэн сэтгэгдлүүд олноор бичигдсэний улмаас тухайн нийтлэлийг устгахад хүрчээ.
Энэхүү маргааны дараа тус коллежийн декан Стивен Гэллоуэй оюутнуудад хандан, кино төслүүддээ AI технологийг “оригинал, эрч хүчтэй, бүтээлчээр” ашигласан тохиолдолд 40,000 ам.долларын санхүүгийн буцалтгүй тусламж үзүүлэхээр болсноо мэдэгдсэн байна.
Чапмэн их сургуулийн төлөөлөгчийн зүгээс “Бид хичээл болон хичээлийн гадуурх үйл ажиллагаандаа хиймэл оюун ухааныг бодолтой, төлөвлөгөөтэйгээр нэвтрүүлэхээр ажиллаж байна. Үүний хүрээнд AI-гийн давуу тал, болзошгүй эрсдэлийг судлах салбар хоорондын ажлын хэсэг байгуулж, оюутнуудын дунд судалгаа явуулж эхэлсэн. AI нь хэдийнэ нийгмийн нэг хэсэг болж, олон салбарт өргөнөөр ашиглагдах болсон” хэмээн байр сууриа илэрхийллээ.
