Японы зүүн хойд эргийн орчимд 7.7 магнитудын хүчтэй газар хөдлөлт болж, цунамийн аюулаас сэрэмжлүүлэн оршин суугчдыг нүүлгэн шилжүүлж эхэллээ. Албаны хүмүүс ирэх долоо хоногийн хугацаанд дахин “маш хүчтэй” газар хөдлөлт болох эрсдэл нэмэгдсэнийг анхааруулж байна.
Нийслэл Токио хотоос хойд зүгт 530 км-ийн зайд орших Ивате мужийн эрэг орчимд газар хөдлөлт болсны дараа эргийн бүсийн мянга мянган иргэнийг өндөрлөг газарт гарахыг тушаажээ. Одоогоор далайн давалгааны өндөр 80 см-т хүрээд байгаа ч Цаг уурын агентлагаас 3 метр хүртэлх өндөр цунами үүсэж болзошгүйг болон ирэх долоо хоногт 8.0-аас дээш магнитудын хүчтэй газар хөдлөх магадлал ердийн үеийнхээс харьцангуй өндөр байгааг онцгойлон анхаарууллаа.
Япончуудын хувьд 2011 онд тохиосон аймшигт газар хөдлөлт, цунамийн улмаас 18,000 гаруй хүн амь үрэгдэж, Фукушимагийн цөмийн цахилгаан станцад осол гарсан гашуун дурсамж одоог хүртэл арилаагүй байгаа юм.
Нөхцөл байдал газар дээрээ
Даваа гарагт болсон газар доорх чичирхийлэл 10 км-ийн гүнд бүртгэгдсэн бөгөөд Хоншю болон Хоккайдо арлын оршин суугчдад аюулаас сэрэмжлүүлэх дохио өгсөн байна. Хүчтэй чичирхийлэл Токио хотод хүртэл мэдрэгджээ.
Хоккайдод амьдардаг Мьянмар улсын иргэн Чав Су Тве ВВС агентлагт өгсөн ярилцлагадаа: “Газар хөдлөлтийн дохио сонсогдмогц хүн бүр барилгаас гүйн гарсан. Орон нутгийн засаг захиргаанаас чанга яригчаар цунамийн аюулаас сэрэмжлүүлж, сонор сэрэмжтэй байхыг сануулж байна. Албан байгууллагууд ажилчдаа эрт гэр рүү нь явууллаа” гэж ярьжээ.
Японы Засгийн газрын Хэрэг эрхлэх газрын дарга Минорү Кихарагийн мэдээлснээр, хурдны галт тэрэгний хөдөлгөөнүүд саатаж, зарим бүсэд цахилгаан тасарсан байна. Одоогоор хүний амь нас эрсэдсэн болон их хэмжээний хохирол учирсан тухай мэдээлэл ирээгүй байна.
Засгийн газрын анхааруулга
Ерөнхий сайд Санаэ Такаичи иргэдэд хандан “Аюулгүй, өндөрлөг газар руу яаралтай нүүх”-ийг уриалав. Цаг уурын агентлагаас (JMA) цунамийн давалгаа давтан цохилт өгөх магадлалтай тул сэрэмжлүүлэг цуцлагдах хүртэл аюулгүй бүсээс гарахгүй байхыг сануулж байна.
Япон улс нь Номхон далайн “Галт цагираг” дээр байрладаг тул жилд дунджаар 1,500 орчим газар хөдлөлт бүртгэгддэг бөгөөд дэлхий даяар болж буй 6.0 болон түүнээс дээш магнитудын хүчтэй газар хөдлөлтийн 10 хувь нь тус улсад тохиолддог байна.
Эх сурвалж: BBC News
