Холливудын хувьд энэ жилийн Талархлын баярын амралтын өдрүүд амжилттай өндөрлөж, “Moana 2,” “Gladiator II,” “Wicked: Part 1” зэрэг кинонуудын амжилтаар түүхэнд бичигдсэн долоо хоног боллоо. Тэгвэл удахгүй нээлтээ хийх бусад кинонууд энэ давалгааг үргэлжлүүлж чадах болов уу? Магадгүй ийм шалтгаанаар Sony Pictures компани “Kraven the Hunter” киноныхоо эхний 8 минутыг нийтэлсэн байж болох юм. Тус кино 10 хоногийн дараа нээлтээ хийхээр төлөвлөжээ.
Комик ном уншигчид Крейвенийг “Spider-Man”-ийн хамгийн хүчирхэг дайснуудын нэг, “Sinister Six” бүлгийн үүсгэн байгуулагч гэдгээр нь сайн мэддэг. Тэрээр 1917 онд Оросын хаан Николай II-ийн засаглал нуран унах үед эх орноосоо дүрвэсэн язгууртан гаралтай дүр. Халуун орны ургамлаас гарган авсан нууцлаг хандыг ууснаар олж авсан чадваруудаараа тэрээр том ангуудыг агнадаг. Тэр шархдахад хэцүү, хүнийхээс давуу хүчтэй, хурц хараа, сонсгол, үнэрлэх чадвартайгаас гадна гарамгай тактик боловсруулагч, гардан тулааны чадварлаг байлдагч.
Кино хувилбар нь Крейвений гарал үүслийн тухай өгүүлэх бололтой. Албан ёсны товч агуулгаас үзвэл:
“Kraven the Hunter” бол Марвелын хамгийн алдартай хорон санаатны нэг хэрхэн бий болсон тухай өгүүлсэн, эрсдэл, адал явдлаар дүүрэн эх түүх юм. Аарон Тэйлор-Жонсон Крейвений дүрийг бүтээж, түүний хэрцгий, хүйтэн сэтгэлтэй эцэг Николай Кравинофф (Рассел Кроу)-той ээдрээт харилцаа нь түүнийг харгис өшөө авалтын зам руу хөтөлж, дэлхийн хамгийн агуу анчин төдийгүй хамгийн аймшигтай нэгэн болоход хүргэдэг.”
Тэйлор-Жонсон болон Кроугийн хамт жүжигчдийн багт Ариана ДеБос Калипсо гэх вуду тахилч, Крейвений хайртай бүсгүйн дүрд; Фред Хечингер Дмитрий Смёрдяков буюу “Хувилгаан,” Крейвений хагас дүүгийн дүрд; Алессандро Нивола Алексей Сицевич буюу “Хирс,” хүн/хирсийн эрлийз болж хувирч чаддаг Оросын хөлсний цэргийн дүрд; Кристофер Абботт “Гадаад хүн” хэмээх хөлсний алуурчин, тагнуулчийн дүрд; мөн Леви Миллер залуу Сергейгийн дүрд тогложээ.
Наймдугаар сард гарсан албан ёсны трейлер нь үзэгчдийн сонирхлыг ихэд татсан. R зэрэглэлд багтахуйц цус, хүчирхийллийг илтгэсэн уг трейлер Жонни Кэшийг “The Man Comes Around” дуугаараа нэмэлт уур амьсгал оруулсан нь өмнөх бүтээлүүдээс огт өөр, илүү харанхуй, өшөө авах хүсэл, эцгийн харилцааны асуудлыг гүнзгий тусгасан байв.
Шинээр гарсан хэсэгт үзэгчдийг Оросын хүйтэн цасанд хучигдсан зэлүүд нутагт авчирна. Хоригдлуудыг автобусаар тээвэрлэж байх үед нэг нь алга болж, алсыг ширтэн бодлогошрон зогсоно. Харгалзагч түүнийг доромжлон, “Чи эндээс амьд гарч чадахгүй” гэж хэлнэ.
Шоронгийн орчинд түүний жирийн нэг хоригдол биш гэдэг нь тодорхой болно. Тэр орчныг байнга ажиглаж, өрөөний хамтрагчдаа гурав хоногоос илүү энд байхгүй гэдгээ хэлдэг. Шоронгийн талбайд болсон зөрчилдөөнөөр түүний гайхамшигтай хүч чадал илчлэгдэнэ. Улмаар тэр шоронгийн дарга, зэвсгийн наймааны “Киров” бүлгийн толгойлогч Чорнийтой нүүр тулж, жинхэнэ зорилгоо харуулна. Крейвен гэм зэмгүй олон хүний амийг авч одсон гэмт хэрэгтнүүдийг ангуучилж, өшөө авдаг домогт “анчин” аж. “Бүх домгийн цаана жаахан ч атугай үнэн бий,” хэмээн тэрээр Чорнийд хэлээд, хоолойг нь хутгаар сэтлэн устгана. Чорнийг устгахын тулд шоронд нэвтэрсэн нь анхнаасаа түүний төлөвлөгөө байсан бөгөөд тэр эцэст нь амжилттай зугтана.
Үнэндээ, энэ бол киноны маш хүчирхэг эхлэл бөгөөд бүтээл бүхэлдээ үзэгчдийн хүлээлтэд нийцэх болов уу. “Kraven the Hunter” кино 2024 оны арванхоёрдугаар сарын 13-нд нээлтээ хийнэ.
arstechnica.com
