Клэй Томпсон, Пол Жорж, Патрик Беверлигийн маргаан
Голдэн Стэйт Уорриорсын домогт гурвал болох Стефен Карри, Клэй Томпсон, Дрэймонд Грийн нарын тоглолт тухайн үеийн НБА-г ноёрхож, Ларри О’Брайен цомыг авахын тулд өрсөлдөгч багууд тэднийг даван туулах шаардлагатай болдог байв. Карри довтолгооны гол зохион байгуулагч байсан ч, Томпсон ид халсан үедээ зогсоохын аргагүй тоглогч байлаа. Тэгвэл Пол Жорж ийм нөлөөтэй байсан уу? Магадгүй. Харин Патрик Беверлигийн бодлоор тэр Клэйгээс ч илүү гэнэ.
Энэ нь Пол Жоржийг буруутгасан шүүмжлэл бус, харин Беверлигийн хэлсэн үгнүүдэд хариулт өгч буй хэрэг юм. Тэрээр “Карри Жоржтой хамт байсан бол илүү олон цомтой байх байсан” гэж хэлсэн нь шуугиан тарьсан. Гэвч Уорриорсын ноёрхлын цөм нь Сплэш ах дүүсийн холбоо байв. Тэдний нэгийг нь хасахад тэр орон зайг өөр тоглогчоор нөхөх боломжгүй, тэр тоглогч Пол Жорж шиг агуу байсан ч гэсэн.
Долоон удаагийн аварга Роберт Хорри өөрийн подкаст Big Shot Bob-д энэ талаар ярьж, Жорж Томпсоны орон зайг нөхөх боломжгүй гэдгийг онцолсон. Хорри Жоржийн довтолгооны чадварыг үнэлсэн ч, Клэйгийн тоглолтын хэв маяг, ялангуяа хамгаалалтын чанарт хүрэхгүй гэж үзжээ.
Тэрээр Клэй Томпсон гэмтэл авахаасаа өмнө НБА-гийн шилдэг хамгаалагчдын нэг байсан бөгөөд Пол Жоржийн хамгаалалтын чадвараас давуу гэж тэмдэглэсэн байна. Мөн Хорригийн үзэж буйгаар, Уорриорсын гурвалын харилцан уялдаа төгс байсан тул Жорж багт орсон ч Дрэймонд Грийний хамт хэрхэн зохицох нь эргэлзээтэй.
Уорриорсын гурвал НБА-гийн түүхэнд мартагдашгүй мөчүүдийг үлдээж, өрсөлдөгчдөд олон шөнө нойргүй хонох шалтгаан болж чадсан. Беверлигийн хэлсэн үгнээс эсрэгээр, хэрэв Клэй Томпсон гэмтээгүй бол Уорриорсын ноёрхол бүр ч олон аваргын цомоор баталгаажих байсан гэдэгтэй маргах хүн ховор биз.
Эх сурвалж: The SportsRush
