Нарны хүчтэй дэлбэрэлтүүдийн нууцыг тайлах шинэ нээлт
Нарнаас гарах хүчтэй дэлбэрэлтүүд нь Дэлхийн соронзон оронд нөлөөлж, заримдаа технологийн системүүдийг доголдуулдаг. Харин одоо хамгийн өндөр нягтралтай зураглалын тусламжтайгаар эрдэмтэд нарны хамгийн жижиг, нууцлаг бүтэц рүү анхаарлаа хандуулж эхэллээ.
2024 оны 8-р сарын 8-нд Нарны гадаргаас X1.3 ангиллын хүчтэй дэлбэрэлт болж, энэ удаа Дэлхий хамгийн сайн ажиглах боломжтой байсан юм. Хавайд байрлах Даниел К. Иноуэ Нарны телескопоор уг үзэгдлийг ажиглаж, урьд өмнө хараагүй гайхалтай дүрслэлүүдийг авсан байна.
Нарны дэлбэрэлтийн аюул
Нарны дэлбэрэлтүүд нь хиймэл дагуулын ажиллагаа, радио холбоо, цахилгаан сүлжээ, нисэхийн навигацид шууд нөлөөлөх эрсдэлтэй. Эдгээр нь Нарны соронзон шугамууд тасарч, дахин холбогдох үед үүсдэг. Гэвч яг хаана, хэрхэн эхэлдгийг тайлбарлахад хүндрэлтэй байсан бол шинэ өндөр нягтралтай зураглал энэ нууцыг тайлах түлхүүр болж байна.
Телескопоор олж харсан дүрслэлүүд
Энэ удаагийн ажиглалтаар эрдэмтэд урьд өмнө хэзээ ч тэмдэглэгдээгүй нарийн коронал гогцоонуудыг илрүүлжээ. Нарны соронзон шугам даган урсах халуун плазмын эдгээр нумууд ердөө 48 км өргөнтэй, зарим нь бүр 21 км хүртэл нарийхан байсан нь онцлог. Өмнө нь ажиглагдаж байсан гогцоонууд хэдэн зуун, бүр мянган км өргөнтэй байжээ.
Гэнэтийн нээлт
Эрдэмтэд энэ нээлтийг төлөвлөөгүй байсан ч Нарны хромосфер буюу гадаргын дээд хэсгийг судлах явцад илрүүлсэн байна. Шинэ дүрслэлүүд нь Нарны гадаргаас дээш өргөгдсөн олон зуун нарийн утаслаг бүтэцтэйг харуулсан бөгөөд энэ нь телескопоор харж болох хамгийн нарийн дүрслэлд тооцогдож байна.
Дэлхийд үзүүлэх нөлөө
Нарны шуурга нь бидний өдөр тутамд хэрэглэдэг технологийн дэд бүтцэд шууд нөлөөлөх эрсдэлтэй. GPS, цахилгаан түгээх систем, интернетийн кабелууд бүгд хүчтэй нарны дэлбэрэлтийн үед доголдож болзошгүй. Харин шинэ судалгааны үр дүн нь нарны үзэгдлийг илүү нарийвчлалтай таамаглах боломжийг эрдэмтдэд олгож байгаа юм.
Энэхүү судалгаа The Astrophysical Journal Letters сэтгүүлд нийтлэгдсэн бөгөөд Нарны нууцыг илүү гүнзгий ойлгоход чухал алхам болж байна.
Эх сурвалж: www.earth.com
