Шинэ судалгаагаар орчлон ертөнц 27 тэрбум жилийн настай бөгөөд бидний мэддэг харанхуй бодис, харанхуй энерги нь огт оршдоггүй байж болзошгүйг дэвшүүлжээ.
Орчлон ертөнцийн бүтэц энгийн мэт санагддаг од, хий, тоосонцор, тэдгээрийг холбодог таталцлын хүч. Гэвч өнгөрсөн хэдэн арван жилийн турш эрдэмтэд бидний харж чаддаггүй, мэдэрч чаддаггүй, үл үзэгдэх хоёр нууцлаг хүчин зүйл болох харагддаггүй бодис, харанхуй бодис ба харанхуй энерги, орчлонгийн ихэнхийг бүрдүүлдэг гэж итгэж ирсэн билээ.
Гэвч энэ онол одоо ганхаж эхэлж магадгүй байна. Канадын Оттавагийн их сургуулийн астрофизикч профессор Ражендра Гупта орчлон ертөнцийг тайлбарлах шинэ загварыг танилцууллаа. Тэрбээр харанхуй бодис, харанхуй энерги зэрэг үл харагдах нууцлаг хүчин зүйлсийг тайлбарлах шаардлагагүй гэж үзэж байна.
🔭 “Ядарсан гэрэл-Tired light” ба өөрчлөгдөж болох байгалийн тогтмолууд
Гуптагийн боловсруулсан загвар хоёр үндсэн ойлголтыг нэгтгэдэг:
- CCC (Co-moving Coupling Constants) буюу орон зай, цаг хугацааны явцад байгалийн тогтмолууд өөрчлөгдөж болох тухай таамаг.
- TL (Tired Light) буюу гэрэл орчлонгийн алсын зайг туулж ирэхдээ бага багаар энерги алдаж, “ядардаг” гэсэн санаа.
Хэрэв энэ хоёр ойлголт үнэн бол, галактикуудын улаан шилжилт болон орчлонгийн тэлэлтийг харанхуй бодис, энерги оролцуулахгүйгээр тайлбарлах боломжтой болно гэж тэр үзэж байна.
🌌 Харанхуй бодисын талаарх эргэлзээ
1930-аад оноос хойш эрдэмтэд галактикийн эргэлтийн хурд, гравитацийн линз, оддын хөдөлгөөнийг хараад “нууцлаг масс” буюу харанхуй бодис байх ёстой гэж үздэг болсон. Гэвч харанхуй бодис, энерги нь хэзээ ч шууд илэрч, хэмжигдэж байгаагүй.
Гупта харин энэхүү “нууцлаг масс”-ыг тайлбарлах өөр гарцыг санал болгож байна. Байгалийн тогтмолууд бага зэрэг өөрчлөгддөг бол таталцлын хүч болон гэрлийн нөлөө өөрөөр илэрч болно.
📊 Судалгааны үр дүн ба цаашдын сорилт
Гуптагийн загвар нь улаан шилжилтийн хэм хэмжээс, бичил долгионы арын дэвсгэр, галактикийн бөөгнөрөл зэрэг орчлонгийн бүтцийн олон чухал хэмжилттэй нийцэж байж магадгүй гэж үздэг. Хэрэв түүний таамаглалууд туршилтаар батлагдвал орчлонгийн нас 13.7 тэрбум биш, 27 тэрбум жил байж болох юм.
Гэхдээ энэ нь одоогоор ердөө л онол бөгөөд шинжлэх ухаанд батлагдахын тулд бодит туршилт, хэмжилтүүдэд нийцэх шаардлагатай.
🧪 Ирээдүйн сорилт ба шинжлэх ухааны зоригтой алхам
Хамгийн чухал асуулт бол: бид харанхуй бодис, энерги гэх ойлголтыг өөрийн мэдлэг, загвараа “зохицуулах” зорилгоор л гаргаж ирсэн үү? Хэрэв Гуптагийн загвар амжилттай батлагдвал орчлонгийн талаарх бидний суурь ойлголт, тэнгэрийг хэрхэн ажиглах арга, сансар судлалын үндсэн онолуудыг шинэчлэх шаардлагатай болно.
📚 Энэхүү судалгаа нь The Astrophysical Journal сэтгүүлд нийтлэгдсэн бөгөөд дэлгэрэнгүйг Earth.com сайтаас унших боломжтой.
Эх сурвалж: www.earth.com
