Лиам Пейний эгч Николагийн сэтгэл догдлуулсан дурсамж: “Хэрвээ тэр үдэш сүүлчийнх нь байсныг мэдсэн бол…”
Дуучин Лиам Пейний ахмад эгч Никола Пейн дүүтэйгээ өнгөрүүлсэн хамгийн сүүлчийн үдшийг дурсаж, сэтгэл хөдөлгөм бичвэрээ олон нийтийн сүлжээнд хуваалцлаа. Тэрээр 2024 оны 10-р сард Аргентинд байрлаж байсан зочид буудлынхаа балконоос унаж, 31 насандаа нас барсан Лиамын төрсөн өдөрт зориулан энэ дурсамжаа нийтэлжээ.
Боулинг, McDonald’s, мөрөөдөл…
Николагийн хэлснээр, өнгөрсөн жил Лиамын төрсөн өдрөөр тэд хамтдаа боулинг тоглож, McDonald’s-д орж, ирээдүйнх нь төлөвлөгөөг ярилцан, инээлдэж, хөгжилдөж байжээ. Тэр үдэш Никола дүүдээ хэрхэн хайртайгаа, бахархаж явдгаа илэрхийлсэн гэнэ.
“Хэрвээ тэр орой бидний сүүлчийн уулзалт байхыг мэдсэн бол би илүү ихийг хэлэх байсан” хэмээн тэр бичжээ. Тэрээр цаг хугацааг ухрааж, Лиамын инээмсэглэл, хоолойг дахин нэг удаа сонсохыг хүсэж буйгаа илэрхийлсэн байна.
“Төрсөн өдрөө диваажинд тэмдэглэж байгаа байх гэж найдаж байна”
Никола бичихдээ Лиамын дурсамжийг өдөр бүр санан, дүү нь диваажинд аз жаргалтай, амар амгалан байгаасай гэж хүсэж байгаагаа хуваалцжээ. Түүний энэхүү бичвэр олон шүтэн бишрэгчийн сэтгэлийг хөдөлгөж, Лиамын хүний хувьд ямар сайхан сэтгэлтэй нэгэн байсныг дахин санууллаа.
Хайрт бүсгүй Кейт Кассидигийн мэндчилгээ
Лиамын найз бүсгүй Кейт Кассиди мөн түүний 32 насны төрсөн өдрөөр сэтгэл хөдөлгөм бичвэр хуваалцсан байна. Тэрээр Лиамд төрсөн өдрийн мэнд хүргэж чадахгүй байгаадаа сэтгэл шаналж буйгаа илэрхийлж, түүнийг хэрхэн үгүйлж, санаж байгаагаа бичжээ.
Кейт, “Чи 31 насандаа маш олон хүнд баяр баясал бэлэглэсэн. Тэр гэрэл гэгээ одоо ч үргэлжилж байгаа” хэмээн бичиж, хамтдаа өнгөрүүлсэн сайхан дурсамжуудыг насан туршдаа хадгалж явах болно гэж амласан байна.
Харамсмаар үхэл
Лиам Пейн 2024 оны 10-р сарын 16-нд Буэнос-Айрес хотын зочид буудлын гуравдугаар давхрын балконоос унаж, амиа алдсан юм. Үхлийн шалтгааныг тогтоох задлан шинжилгээгээр түүний биед олон төрлийн мансууруулах бодис болон хэт их хэмжээний согтууруулах ундаа илэрсэн болохыг албан ёсоор мэдэгдсэн билээ.
Эх сурвалж: Billboard
