UFC White House эвент: Онцгой арга хэмжээний бэлтгэл
UFC-ийн гүйцэтгэх захирал Дана Уайт спортын түүхэнд өмнө нь байгаагүй онцгой арга хэмжээ болох UFC эвентийг Цагаан ордонд зохион байгуулахаар төлөвлөж байгаа тухайгаа мэдэгдлээ. Гэвч аюулгүй байдлын өндөр шаардлагын улмаас энэхүү тэмцээнд зөвхөн цөөн тооны хүн оролцох боломжтой байх аж.
Дана Уайт “The Herd” нэвтрүүлэгт оролцох үеэрээ эвентийн зохион байгуулалтын ард буй нарийн ажиллагаа, аюулгүй байдлын олон үе шаттай төлөвлөлтийн талаар дэлгэрэнгүй ярьжээ. Тэрээр өнгөрсөн долоо хоногт UFC-ийн удирдлагуудын хамт Цагаан ордонд очиж, Ерөнхийлөгч Дональд Трамптай уулзан арга хэмжээний ерөнхий зураглалыг танилцуулсан байна. Трамп уг санааг ихэд таашаан хүлээн авчээ.
“Цагаан ордны дээвэр дээрээс аюулгүй байдлыг хянаж, хатуу хамгаалалттай орчинд зохион байгуулагдана. Эвентийн өдөр 5,000-аас бага хүн л оролцох боломжтой” хэмээн Уайт онцолсон нь энэхүү арга хэмжээ ямар өндөр төвшинд бэлтгэгдэж байгааг илтгэнэ.
Одоогоор тэмцээний тулаануудыг албан ёсоор зарлаагүй ч Конор МакГрегор, Жон Жонс нар нэрээ дэвшүүлж, оролцох сонирхлоо илэрхийлээд байна. Гэхдээ Уайт өмнө нь Жонсийн оролцоог үгүйсгэсэн удаатай.
Энэхүү UFC эвент нь АНУ-ын 250 жилийн ойг тэмдэглэх баярын хүрээнд зохион байгуулагдах бөгөөд зөвхөн тулаан ч биш, бүхэл бүтэн баяр наадам болон хувирна. Уайт Цагаан ордонтой залгаа байрлах цэцэрлэгт хүрээлэнд 85,000 фенийг нэгтгэхээр төлөвлөж, том дэлгэцүүд, хөгжмийн тоглолт бүхий тайз, олон нийтийн арга хэмжээнүүдийг багтаасан хөтөлбөрөөр Вашингтон хотыг бүхэлд нь UFC-ийн уур амьсгалд автуулахаар зорьж байна.
Тулааны урлагийн түүхэнд шинэ хуудас нээгдэх тэр мөч ойртсоор…
🔗 Эх сурвалж: MMA Fighting
