💫 Тэйлор Свифтийн шинэ кино нээлтээ амжилттай хийлээ
Тэйлор Свифтийн The Official Release Party of a Showgirl кино нь дотоодын кино театруудад нээлтээ хийж, эхний өдрөө л бокс оффисын жагсаалтыг тэргүүллээ. Энэ бүтээл нь түүний 12 дахь студийн цомог The Life of a Showgirl-ийн ард талын үйл явдлыг харуулсан нэг удаагийн тусгай үзүүлбэр юм.
Кино нь зөвхөн нэг амралтын өдрөөр гарч байгаа бөгөөд 3,702 кино театрт гарч, 28-32 сая ам.долларын (ойролцоогоор 95-109 тэрбум төгрөгийн) орлого олох төлөвтэй байна гэж Свифтийн баг болон AMC Theatres мэдээлжээ. Харин зарим студиудын таамаглалаар эхний амралтын өдрийн орлого 35 сая ам.доллар (ойролцоогоор 119 тэрбум төгрөг) давж магадгүй гэж үзэж байна.
The Hollywood Reporter-ийн мэдээлснээр, эхний өдөр үзэгчдийн 90 орчим хувь нь эмэгтэйчүүд байжээ. Үүний зэрэгцээ Dwayne Johnson-ийн The Smashing Machine кино 6 сая ам.долларын орлого олж, анхны хүлээлтээс доогуур дүн үзүүлсэн байна.
The Official Release Party of a Showgirl кино нь үзэгчдээс A+ CinemaScore үнэлгээг хүртсэн бөгөөд энэ нь Свифтийн 2023 оны Taylor Swift: The Eras Tour концертын кинотой адил амжилт гаргаж байгааг харуулж байна.
89 минут үргэлжлэх тус кинонд цомгийн эхний дуу болох “The Fate of Ophelia” дууны клипийн нээлт, зураг авалтын ард талын үйл явдал, дууны үгтэй видеонууд, мөн Свифтийн бүтээлч үйл явцын талаархи бодлууд багтжээ.
Энэхүү тусгай үзүүлбэр нь 10-р сарын 3-5-ны хооронд кино театруудад гарч байгаа бөгөөд Billboard сэтгүүл уг киноны талаархи 8 гол санааг онцолсон байна. Тэйлор Свифт өмнө нь ч бокс оффист амжилт үзүүлж байсан бөгөөд 2020 онд Miss Americana баримтат киногоо Netflix дээр гаргаж, 2023 онд The Eras Tour концертын киногоо гаргасан. Тус кино нь дотооддоо 179.2 сая ам.долларын (ойролцоогоор 610 тэрбум төгрөгийн) орлого олж, бүх цаг үеийн хамгийн их орлого олсон концертын кино болсон юм.
Эх сурвалж: 🔗 Billboard
