Хиймэл оюун ухааны чатботуудыг сэтгэл заслын эмчийн оронд ашиглах нь хувийн болон мэргэжлийн олон сөрөг үр дагавартай гэж мэргэжилтнүүд үзэж байна. Эдгээр чатботууд нь сэтгэл заслын эмчилгээний хувьд үр дүн муутай төдийгүй сэтгэцийн суурь өвчтэй хүмүүст, тэр байтугай эрүүл хүмүүст ч аюултай нөхцөл байдал үүсгэх эрсдэлтэй ажээ.
Үүнээс гадна мэргэжлийн сэтгэл заслын эмч нарын ажлын байр хямд өртөгтэй, чанар муутай чатботуудад шахагдаж байгаа нь бодит аюул болоод байна. Энэ долоо хоногт Калифорни мужийн хойд хэсэгт сэтгэцийн эрүүл мэндийн салбарын 2,400 орчим ажилтан ажлын байрыг нь хиймэл оюун ухаанаар орлуулж байгаад эсэргүүцэл илэрхийлж, 24 цагийн ажил хаялт зарлалаа.
Тэдний ажилладаг “Kaiser Permanente” компани автоматжуулалт явагдаагүй гэж мэдэгдэж байгаа ч ажилчид болон үйлдвэрчний эвлэлийнхэн аюул бодитой нүүрлэж байгааг анхааруулж байна. Тусгай зөвшөөрөлтэй нийгмийн ажилтан Илана Маркуччи-Моррис NPR агентлагт өгсөн ярилцлагадаа “Өмнө нь мэргэжлийн эмчийн хийдэг байсан 10-15 минутын үзлэг, оношилгоог одоо тусгай зөвшөөрөлгүй операторууд бэлдсэн текстийн дагуу гүйцэтгэх эсвэл аппликейшн ашиглан хийж байна” гэж ярьжээ.
Эрүүл мэндийн ажилтнуудын санаа зовж буй асуудал нь зөвхөн олноор халагдах тухай биш юм. Тэд хиймэл оюун ухаан нэвтэрснээр ажлын нөхцөл улам дордож байгааг онцолж байна. Тухайлбал, удирдлагуудын зүгээс эмч нарыг нэг ээлжинд илүү олон өвчтөн үзэхийн тулд өвчтөний түүх хөтлөх зэрэг ажлыг AI ашиглан хурдасгахыг шаардах болжээ. Энэ нь өвчтөн бүрт зарцуулах хугацааг багасгаж, эмчилгээний чанарт сөргөөр нөлөөлж байна.
Гэр бүлийн сувилагч Кэти Ромер “Хиймэл оюун ухаан өвчтөнүүдэд болон ажилчдад ашигтай юу, эсвэл зөвхөн корпорацийн ашиг орлогыг нэмэгдүүлэхэд чиглэж байна уу?” гэсэн асуултыг тавьж байгаа юм. Энэхүү ажил хаялтад 23,000 гаруй сувилагч нэгдсэн нь автоматжуулалтын аюул эрүүл мэндийн салбарт хэр хүчтэй мэдрэгдэж байгааг харууллаа.
