Мэргэжлийн боксын таван өөр жинд дэлхийн аварга цолыг эзэмшигч Терренс “Буд” Кроуфорд зодог тайлах шийдвэрээ хэзээ гаргасан талаараа сонирхолтой дэлгэрэнгүй мэдээлэл өглөө. Тэрээр супер дунд жингийн хаан Канело Альваресыг Лас Вегас хотноо шүүгчдийн санал нэгтэй шийдвэрээр буулган авч, боксын түүхэн дэх хамгийн агуу амжилтуудын нэгийг үзүүлснийхээ дараа ийнхүү ярьжээ.
Тулааны өмнө Кроуфорд 14 фунт буюу ойролцоогоор 6.3 кг жин нэмж, дөрөв дэх жиндээ аварга болсныхоо дараа шууд Канелотой тулалдахаар зориглосон юм. Олон хүн үүнийг хэтэрхий эрсдэлтэй алхам гэж үзэж байсан ч Кроуфорд Флойд Мэйуэзер, Дмитрий Бивол нарын адил Канелог ялж чадах гурав дахь боксчин болно гэдэгтээ итгэлтэй байсан бөгөөд зорилгодоо ч хүрсэн билээ.
Саяхан өгсөн ярилцлагадаа тэрээр тулааны үр дүн ямар ч байсан зодог тайлахаар аль эрт төлөвлөсөн байснаа дурджээ. Кроуфорд хэлэхдээ, “Би дасгалжуулагчдаа хожсон ч, хожигдсон ч энэ миний сүүлчийн тулаан байх болно гэж хэлсэн. Удаан хугацаанд хуримтлагдсан жижиг бэртэл гэмтлүүд болон бие махбодийн эдэлгээ миний шийдвэрт нөлөөлсөн. Би рингэнд гарахдаа хэзээ ч бэртэлтэй гэж гомдоллодоггүй, зүгээр л хийх ёстой зүйлээ хийдэг” хэмээсэн байна.
Нийт 42 тулаан хийж, нэг ч ялагдалгүйгээр замналаа өндөрлүүлсэн Кроуфорд өөрийгөө боксын түүхэнд нотлох зүйлээ дуусгасан гэж үзэж байгаа аж. Тэрээр таван өөр жинд дэлхийн аварга болж, өөрийн үеийн шилдэг боксчин гэдгээ баталсан тул ийнхүү оргил үедээ рингээ орхихоор шийджээ. Харин түүнд ялагдсан Канело Альварес ирэх есдүгээр сард эргэн ирж, дэлхийн аваргын бүсээ хамгаалах тулаан хийхээр төлөвлөж байгаа ч албан ёсны тов хараахан гараагүй байна.
