HBO телевизийн дэлхий даяар шуугиан тарьж буй “The Last of Us” цувралын гуравдугаар бүлгийн зураг авалт Канад улсын Ванкувер хотод албан ёсоор эхэллээ. Зураг авалтын талбайгаас авсан анхны дүрс, бичлэгүүд цахим орчинд тархаж, үзэгчдийн дунд хүлээлт үүсгээд байна. Задарсан дүрс бичлэгт цувралын гол дүрүүд болох Аби (жүжигчин Кейтлин Девер) болон Лев (жүжигчин Кириана Кратер) нарын дүр төрх анх удаа ил боллоо.
Бичлэгт Аби барилгын дээгүүр галт зэвсэг барин сонор сэрэмжтэй алхаж буй хэсэг харагдах бол Лев өөрийн нэрийн хуудас болсон нум сумаа агссан байдалтай дүрслэгджээ. Энэхүү шинэ бүлэг нь Абигийн түүх болон түүний амьдралын эргэлтийн цэгүүдэд илүү төвлөрөх бөгөөд түүний эцгийн дүрийг нэрт жүжигчин Патрик Вилсон бүтээхээр болсон нь шүтэн бишрэгчдийн сонирхлыг ихээр татаж байна.
Түүнчлэн Левийн дүрийн сонголт олон нийтийн сүлжээнд багагүй хэлэлцүүлэг өрнүүлээд байна. Кино зохиолд Лев 13 настай трансжендер хүүгийн дүрээр гардаг бол уг дүрд 15 настай эмэгтэй жүжигчин Кириана Кратерыг тоглуулахаар сонгосон нь үзэгчдийн дунд өөр өөр байр суурь үүсгэв. Цувралын продюсеруудын зүгээс жүжигчний ур чадвар болон дүрийн мөн чанарыг гаргах тал дээр голчлон анхаарсан гэдгээ мэдэгдсэн юм.
Кино сонирхогчдын таамаглаж буйгаар гуравдугаар бүлэг нь тус цувралын төгсгөлийн хэсэг байх магадлалтай бөгөөд “The Last of Us Part II” тоглоомын үйл явдлыг бүрэн зангидах зорилготой аж. Зураг авалтын явц ийнхүү эрчимтэй үргэлжилж байгаа нь цувралын нээлт болох хугацаа ойртож буйг илтгэж байна.
Дэлгэрэнгүйг эх сурвалжаас харах
