Дэлхийн хамгийн том тоглоомын платформ болох Steam-ийг эзэмшигч Valve компани Вашингтон болон Техас мужуудын хэрэглэгчдээс гаргасан шинэ нэхэмжлэлтэй тулгарлаа. “Hagens Berman” хуулийн фирмээс гаргасан уг нэхэмжлэлд Valve-ийн тоглоомууд дахь нууцлаг хайрцаг нээх систем нь мөрийтэй тоглоомын шинж чанарыг агуулж байна хэмээн буруутгажээ.
Нэхэмжлэл гаргагчдын дунд “Counter-Strike 2” болон “CS:GO” тоглоомонд их хэмжээний мөнгө зарцуулсан хэрэглэгчдээс гадна насанд хүрээгүй хүүхдэдээ зориулж худалдан авалт хийсэн эцэг эхчүүд багтсан байна. Энэ нь Valve компанийг хүүхэд, залуучуудыг мөрийтэй тоглоомд уруу татсан гэх үндэслэлээр шүүхийн өмнө хариуцлага хүлээлгэх дарамтыг улам нэмэгдүүлж байгаа юм. “Hagens Berman” фирмийн зүгээс нийт 5 сая гаруй ам.долларын нөхөн төлбөр шаардаж, ижил төрлийн хохирол амссан хэрэглэгчдийг нэгдэхийг уриалжээ.
Valve компанийн зүгээс эдгээр хайрцгуудыг бейсболын карт эсвэл Покемон карт цуглуулахтай адил энгийн бүтээгдэхүүн хэмээн тайлбарлаж, мөрийтэй тоглоом гэдгийг үгүйсгэсээр ирсэн. Мөн тэд гуравдагч этгээдийн мөрийтэй тоглоомын сайтуудтай ямар нэгэн холбоогүй бөгөөд дүрмийн бус ашиглалт хийсэн сая гаруй дансыг хааснаа мэдэгдсэн байна. Гэвч Вашингтон мужийн хууль тогтоомжид мөрийтэй тоглоомын тодорхойлолт маш өргөн байдаг нь Valve-д хүндрэл учруулж болзошгүйг шинжээчид онцолж байна.
Энэхүү хэрэг нь зөвхөн Valve-оор зогсохгүй “Roblox”, “Fortnite” зэрэг тоглоом доторх худалдан авалттай бусад платформуудын хувьд ч чухал жишиг болох юм. “Roblox” платформын удирдлагууд энэ хэргийг анхааралтай ажиглаж байгаа бөгөөд тоглоомын салбар дахь виртуал эд зүйлсийн худалдаа, бодит мөнгөний эргэлтэд тавих хяналт шалгалт ирэх жилүүдэд улам чангарах төлөвтэй байна.
Дэлгэрэнгүйг эх сурвалжаас харах
