Мэргэжлийн боксын хагас хүнд жингийн (79.4 кг) дэлхийн аварга Дмитрий Бивол рингэнд эргэн ирэх төлөвлөгөөгөө танилцуулсан ч аваргын бүсүүдээ хамгаалж үлдэхэд хүндхэн даваа тулгарч байна. Тэрээр 2025 оны хоёрдугаар сард Артур Бетербиевийг нөхөн тулаанд ялж дэлхийн аварга болсон ч нурууны бэртлийн улмаас хагалгаанд орж, 2026 он хүртэл түр завсарлага аваад байсан юм.
Одоо эдгэрч буй Бивол IBF холбооны заавал хамгаалах тулаанаа Майкл Айфертийн эсрэг хийхээр төлөвлөж буйгаа зарласан. Гэвч WBO байгууллагын зүгээс түүнд хатуу шаардлага тавьж эхэллээ. Ring Magazine-ийн мэдээлснээр, WBO-оос ирэх дөрөвдүгээр сарын 18-нд Ливерпүүлд болох Каллум Смит болон Дэвид Моррелл нарын тулааны ялагчтай Биволыг тулалдахыг тушаахаар бэлтгэж байна. Хэрэв Бивол энэхүү тушаалыг биелүүлж, заавал хамгаалах тулаан хийхгүй бол WBO бүсээ алдах эрсдэлтэй юм.
Дмитрий Бивол ирэх онд Майкл Айфертээс гадна Артур Бетербиевтэй гурав дахь тулаанаа хийх, Дэвид Бенавидез болон Канело Альваресстай дахин тулалдах хүсэлтэй байгаагаа илэрхийлсэн. Тэр байтугай хүнд жин буюу cruiserweight (90.7 кг) ангилалд дэвшиж, хоёр дахь жингийнхээ бүсийг авах амбицтай байгаагаа ч нуугаагүй.
Гэвч боксын холбоодын ээлжит шаардлагууд түүний энэхүү “мөрөөдлийн” жагсаалтыг өөрчлөхөд хүргэж магадгүй байна. Тухайлбал, Дэвид Бенавидез тавдугаар сард Гилберто Рамиресийн эсрэг тулалдсаныхаа дараа Биволтой нэгдсэн тулаан хийж чадахгүй бол Артур Бетербиевийг сонгох магадлалтай байгаа юм. Ирэх саруудад болох тулаануудын үр дүн хагас хүнд жингийн аваргын бүсүүд хэний гарт үлдэхийг шийдэх эгзэгтэй мөч байх болно.
