Челси клубын дэд ахлагч Энцо Фернандес багийнхаа дотоод соёл болон ёс зүйн хэм хязгаарыг давсан мэдэгдэл хийсний улмаас ирэх хоёр тоглолтод оролцох эрхээ хасууллаа. Шинээр томилогдсон дасгалжуулагч Лиам Росениор уг шийдвэрийг гаргасан бөгөөд энэ нь багийн тоглогчдоос сэтгэл зүйн тогтвортой байдал болон нэгдмэл байдлыг шаардаж буй хэрэг юм.
Аргентины телевизийн шоунд оролцохдоо Энцо “Би Мадрид хотод маш их дуртай, учир нь энэ хот Буэнос-Айрестай тун төстэй. Хоол хүнс болон бусад бүх зүйл нь таалагддаг” хэмээн ярьсан нь түүнийг “Реал Мадрид”-тай холбох цуурхлыг улам дэвэргэсэн юм. Дасгалжуулагч Росениор үүнийг багийн үнэт зүйлд нийцэхгүй, хариуцлагагүй үйлдэл хэмээн үзэж, шийтгэл ногдуулахаар шийджээ.
Дасгалжуулагч Росениор хэлэхдээ: “Энцог би хувь хүнийх нь хувьд хүндэлдэг, тэр багийнхаа амжилтын төлөө бухимдаж байгааг ойлгож байна. Гэхдээ бидний барьж байгуулахыг хүсэж буй багийн соёлд тодорхой хил хязгаар бий. Энэ шийдвэр нь зөвхөн минийх биш, клубын эзэд болон спортын захирлуудын нэгдмэл байр суурь юм” хэмээн онцолсон байна.
Энцо Фернандес энэ улиралд “Челси”-гийн төлөө 30 тоглолтод оролцож, дамжуулалтын 86 хувийн амжилт үзүүлсэн багийн гол хөдөлгүүр билээ. Тэрээр 2023 онд 107 сая фунт стерлингээр Британийн дээд амжилтыг тогтоон ирсэн ч ийнхүү сахилга батын асуудалд ороод байна.
Шийтгэлийн улмаас тэрээр ФА Капын шөвгийн наймд “Порт Вэйл”-тэй хийх тоглолт болон Премьер лигийн чухал өрсөлдөгч “Манчестер Сити”-гийн эсрэг тоглолтуудыг өнжихөөр боллоо. Энцо ирэх дөрөвдүгээр сарын 18-нд “Манчестер Юнайтед”-тай хийх тоглолтод талбайд эргэн ирэх боломжтой юм.
